Biryńǵaı jıyntyq tólem qandaı múmkindikter beredi
Zań jobasy Memleket basshysynyń ózin-ózi jumyspen qamtyǵan halyqtyń qyzmetin formalızatsııalaý jáne áleýmettik qamsyzdandyrý júıelerine qatysýyn qamtamasyz etý maqsatynda ázirlengen. Ózgerister men tolyqtyrýlar 3 kodekske jáne 6 zańǵa engiziledi.
«Zań jobasynyń negizgi jańalyǵy beıresmı jumyspen qamtylǵandardyń qyzmetin 2019 jylǵy
1 qańtardan bastap salyq organdarynda tirkeýdiń jeńildetilgen tártibin kózdeıtin jańa quqyqtyq rejimdi, ıaǵnı Biryńǵaı jıyntyq tólemdi (BJT) engizý bolyp tabylady. Respýblıka ekonomıkasynda jalpy jumyspen qamtylǵandardyń 16 paıyzy (1 mln 376 myń adam) beıresmı jumyspen qamtylǵandar, onyń ishinde 800 myńǵa jýyq jaldamaly jumysker eńbek shartynsyz jumys isteıdi jáne 588 myń adam ózin-ózi jumyspen qamtyǵandar», - dep toqtaldy QR Eńbek jáne halyqty áleýmettik qorǵaý mınıstri Mádına Ábilqasymova.
Aǵymdaǵy jaǵdaı kórsetkendeı, jumystyń beıresmı túrinde bolýyna salyq organdarynda tirkelý ári esepten shyǵý kedergileri, tólem júıeleriniń kóptigi jáne salyq rejimin anyqtaýdyń qıyndyǵy áser etedi.
«Beıresmı jumyspen qamtylǵandardyń qyzmetin tirkeýdi jeńildetý úshin Biryńǵaı jıyntyq tólemdi engizý usynylady. Biryńǵaı jıyntyq tólemdi tóleý beıresmı jumyspen qamtylǵandardyń qyzmetin tirkeýmen qatar, mindetti medıtsınalyq jáne áleýmettik saqtandyrý, zeınetaqymen qamsyzdandyrý júıelerine qatysýǵa múmkindik beredi. BJT jumys isteıtin Qazaqstan azamattary úshin 4 mindetti tólemdi bir tólemmen almastyrady», - dep naqtylady mınıstr.
Onyń sózine qaraǵanda, Biryńǵaı jıyntyq tólem tóleýshiler úshin kiris salyǵy jáne áleýmettik tólemder boıynsha eń tómen stavkalar respýblıkalyq mańyzy bar qalalarda, Astanada jáne oblystyq mańyzy bar qalalarda 1 aılyq eseptik kórsetkish (2 525 teńge), basqa eldi mekenderde - 0,5 AEK deńgeıinde belgilendi.
Biryńǵaı jıyntyq tólemniń úlesi: jeke tabys salyǵy - 10 paıyzdy; - Memlekettik áleýmettik saqtandyrý qoryna áleýmettik aýdarymdar - 20 paıyzdy; Biryńǵaı jınaqtaýshy zeınetaqy qoryna zeınetaqy tólemderi - 30 paıyzdy; Mindetti áleýmettik medıtsınalyq saqtandyrý qoryna aýdarymdar 40 paıyzdy quraıdy.
Biryńǵaı jıyntyq tólem saýda nysandaryn qosa alǵanda, kommertsııalyq jyljymaıtyn múlik nysan aýmaǵynda qyzmet kórsetetin jeke tulǵalarǵa; turǵyn úıdi qospaǵanda, múlikti jalǵa beretin adamdarǵa; jeke praktıkamen aınalysatyn adamdarǵa; oralmandardy qospaǵanda, sheteldikter men azamattyǵy joq adamdarǵa; dara kásipker retinde memlekettik tirkelgen adamdarǵa qoldanylmaıdy.
«Osylaısha, biryńǵaı jıyntyq tólem jeke tulǵalarǵa ǵana qyzmet kórsetetin jáne jeke qosalqy sharýashylyǵynan túsetin ónimderdi jeke azamattarǵa satatyn jeke tulǵalarǵa qoldanylady. Azamattardyń qalǵan sanattaryna salyq pen áleýmettik tólemderdi tóleýdiń qoldanystaǵy tártibi saqtalady. Biryńǵaı jıyntyq tólemdi engizý nátıjesinde, 500 myń beıresmı jumyspen qamtylǵan adamnyń qyzmetin formalızatsııalaý kózdeledi. Sonymen qatar 65,4 myń tóleýshi patent jáne jeńildetilgen deklaratsııa negizinde qoldanystaǵy salyq rejiminen aýysýy múmkin», - dedi Mádına Ábilqasymova.
Jalpy alǵanda, BJT-ny engizý beıresmı jumyspen qamtylǵandarǵa Mindetti áleýmettik medıtsınalyq saqtandyrý júıesine qatysýǵa jáne medıtsınalyq mekemelerdi tańdaý quqyǵymen somasy men túrleri shektelmegen medıtsınalyq qyzmetterge qol jetkizýge múmkindik beredi. Budan bólek jınaqtaýshy zeınetaqy júıesine qatysýǵa jáne júıege qatysý ótiline qaraı bazalyq zeınetaqy tólemin alýǵa, sondaı-aq áleýmettik tólemder alýǵa jaǵdaı jasaıdy.