«Biryńǵaı tereze» qaǵıdaty boıynsha 2 myńǵa jýyq adam «qandas» mártebesin aldy

ASTANA. QazAqparat - QR Syrtqy ister mınıstrliginiń shet elderdegi mekemeleri arqyly «qandas» mártebesin alýdyń jańa tetigin iske asyrý jónindegi pılottyq joba sheńberinde «biryńǵaı tereze» qaǵıdaty boıynsha 656 otbasyndaǵy 1997 etnıkalyq qazaqtan ótinish qabyldandy.

Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, etnıkalyq qazaqtardyń bul ótinishteri Qazaqstannyń soltústik óńirlerine joldandy.

Ótinishderdi qabyldap alǵan jergilikti atqarýshy organdar olardy qarastyrýy jáne turaqty qonystaný orny, jumysqa ornalasý jáne óńirlik kvotaǵa engizý boıynsha usynystaryn berýi tıis.

Etnıkalyq qazaqtardy qabyldaý tetigin qaıta qaraý QR 2023-2027 jyldarǵa arnalǵan kóshi-qon saıasaty tujyrymdamasyn iske asyrý sheńberinde júrgizildi.

Ózgeristerdiń Qazaqstan elshilikteri arqyly qujattardy qabyldaýdyń jańa formatyna ǵana emes, qandastardy qonystandyrýdyń myna mehanızmderine de qatysy bar, atap aıtqanda:

- QR Úkimeti aıqyndaǵan óńirlerge qonystandyrý;

- demografııalyq damýǵa qajettiligi bar damý áleýeti bar aglomeratsııalar men aýyldyq eldi mekenderdiń, shaǵyn jáne monoqalalardyń, aýdandyq jáne oblystyq mańyzy bar qalalardyń aýmaqtarynda qonystandyrý;

- Qazaqstan aýmaǵynda jáne QR azamattary bolyp tabylatyn otbasy músheleri nemese jaqyn týystary turaqty turǵan jaǵdaıda (turǵyn úı máselelerin óz betinshe sheshý múmkindigimen) otbasymen qaýyshý;

- bos jumys ornyna ornalasý maqsatynda (turǵyn úı máselelerin óz betinshe sheshý múmkindigimen) jumys berýshilerdiń shaqyrýy.