Biryńǵaı kommýnaldyq kásiporyn qurǵan mańyzdy - D. Nazarbaeva

ASTANA. QazAqparat - Elimizde turǵyn úı-kommýnaldyq sharýashylyǵyn basqaratyn biryńǵaı kommýnaldyq kásiporyn qurylǵany mańyzdy. Búgin Májiliste «Nur Otan» parlamenttik fraktsııasy janyndaǵy Óńirlik saıasat jáne máslıhattarmen jumys jónindegi keńesiniń keńeıtilgen otyrysynda palata vıtse-spıkeri Darıǵa Nazarbaeva osyndaı usynys jasady. Eske salaıyq, jıynda elimizdegi turǵyn úı-kommýnaldyq sharýashylyǵyn jańǵyrtý barysy talqylanǵan bolatyn.

«Bizge barlyq kommýnaldyq jelilerdi, sý, gaz, elektr, jylý sekildilerdiń barlyǵyn biriktiretin biryńǵaı kommýnaldyq kásiporyn qurýǵa barý kerek, bul salaǵa biryńǵaı memlekettik saıasat jetispeıdi. Óıtkeni, bul sala bizdiń elimizdiń qan tamyrlary sekildi, al olar buzylyp, qıraı bastasa, olardyń jumysynyń arasynda biryńǵaı úılesimdilik bolmasa - onda tutynýshylarǵa, bizge qaýip tónip tur degen sóz», - dedi D. Nazarbaeva.

Onyń aıtýynsha, turǵyn úı-kommýnaldyq sektorǵa qyzmet kórsetetin kompanııalardy ózderiniń qarajattarynyń bir bóligin sektordy jańǵyrtýǵa jumsaıtyndaı mindettemelerdi zań arqyly engizý kerek.

«Biz qaıta-qaıta jaqsartýǵa tıispiz dep aıtamyz, sosyn memleketten aqsha bólý kerek deımiz. Al negizinen osy sala bıznes úshin jaman emestigi baıqalady, sektorda qyzmet etetin kompanııalar, qurylymdar barshylyq, olarda bekitilgen tarıfter de bar ekenin qarasaq, eshqaısysy shyǵyndy emes, kerisinshe tabysty. Endeshe, basty másele - olardy qalaı jumys istetý qajettiginde bolyp otyr, olardyń tabysynyń bir bóligin jańǵyrtý jumystaryna jumsatýǵa tıispiz. Al «tarıf joǵary», «aqsha kerek» dep aıqaılaı bergennen túk shyqpaıdy. Ondaı áńgime taýsylmaıdy da», - dedi D. Nazarbaeva.