«Birtutas álemdik úkimet qalyptaspaıynsha, daǵdarys jalǵasa beredi» - aqparat feık

NUR-SULTAN. QazAqparat - Áleýmettik jelilerde saıasattanýshy jáne Amerıka prezıdentteriniń keńesshisi retinde tanystyrylǵan Zbıgnev Bjezınskıdiń sózderi keltirilgen beınerolık tarady. Ol onda álemdegi daǵdarys birtutas álemdik úkimet qalyptasqanǵa deıin jalǵasatynyn aıtady-mys. Stopfake.kz anyqtaǵandaı, bul aqparat – feık, dep habarlaıdy QazAqparat.

Rasymen de, Zbıgnev Bjezınskı AQSh-tyń áıgili saıasatkeri, tórt Prezıdenttiń, sonyń ishinde Bıll Klınton men Barak Obamanyń keńesshisi bolǵan. Óziniń uzaq jyldarǵy mansabynda daǵdarystar týraly birneshe márte aıtqan, tipti «Ekinshi múmkindik: úsh prezıdent jáne amerıkalyq joǵarǵy derjavanyń daǵdarysy» (Second Chance: Three Presidents and the Crisis of American Superpower) atty kitap ta jazdy.

«Alaıda, onyń ártúrli daǵdarystar týraly málimdemelerinde birtutas álemdik úkimet qurý týraly eshteńe aıtylmaǵan.
Álemdi tańdaýly adamdar toby basqarady degen teorııa dáleldenbegen jáne jańa álemdik tártip týraly konspırologııa teorııasynyń bóligi bolyp tabylady. Buǵan deıin biz osy ıdeıanyń barlyq «rastaýlary» nege jalǵan ekendigi týraly egjeı-tegjeıli jazǵan bolatynbyz», - dep jazady Stopfake.kz.

Málim bolǵandaı, Zbıgnev Bjezınskııdiń biryńǵaı álemdik úkimetti qurý týraly aıtqany jaıly habarlamalardy Delfi.ru portalynyń faktchekerleri de joqqa shyǵardy.
Demek, tanymal saıasatker jańa álemdik tártip týraly málimdedi dep aıtýǵa negiz joq.