Birtanov pen Ábishev isi: Apellıatsııalyq sot úkim shyǵardy

ASTANA. QazAqparat – Apellıatsııalyq sot alqasy Densaýlyq saqtaý eks-mınıstri Eljan Birtanov pen onyń burynǵy orynbasary Oljas Ábishevke qatysty úkimdi ózgerissiz qaldyrdy, dep habarlaıdy QazAqparat tilshisi.

«QR Qylmystyq is júrgizý kodeksiniń 431-baby, 443-baby, 444-baby 1-bóliginiń 1-tarmaǵyn basshylyqqa ala otyryp, sot alqasy qaýly etti: Astana qalasy Saryarqa aýdanynyń 2022 jylǵy 28 qazandaǵy №2 aýdandyq sotynyń Eljan Birtanovqa, Oljas Ábishevke qatysty úkimi ózgerissiz qaldyrylsyn. Qorǵaýshylar men sottalǵandardyń apellıatsııalyq shaǵymdary qanaǵattandyrylmaıdy. Qaýly jarııa etilgen sátten bastap zańdy kúshine enedi», - dedi apellıatsııalyq sot alqasynyń tóraǵasy Aıbek Ámirǵalıev.

Aıta keteıik, byltyr 28 qazanda Eljan Birtanov pen Oljas Ábishevke qatysty sot úkimi shyqqan edi. Oǵan saı, eks-mınıstrge 5 jyl bas bostandyǵyn shekteý, al O.Ábishevke 4 jyl bas bostandyǵyn shekteý túrindegi jaza taǵaıyndalǵan. Sonymen qatar, sot Densaýlyq saqtaý mınıstrliginiń azamattyq talabyn ishinara qanaǵattandyrdy. ıAǵnı, E.Birtanov pen O.Ábishevten Densaýlyq saqtaý mınıstrliginiń paıdasyna 1 mlrd 350 mln 123 myń 129 teńge kóleminde materıaldyq shyǵyn óteýi tıis. Ol úshin 3 aı ýaqyt berilgen. Eger osy aralyqta qajetti soma tólenbese, onda talap májbúrlep oryndaýǵa jatady.

Eske salaıyq, burynǵy Densaýlyq saqtaý mınıstri Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn. Tergeý materıaly boıynsha, eks-mınıstr men onyń orynbasary Oljas Ábishevke «Ericsson Nicola Tesla» kompanııasynyń qyzmetin qoldaný kezinde «laýazymdyq ókiletin teris paıdalaný» arqyly memleketke 1,5 mlrd teńge shyǵyn keltirdi degen aıyp taǵylǵan.