Birtanov otandyq ókpeni jeldetý apparatynyń synaq nusqasyn eýropalyq balamasymen salystyrdy

NUR-SULTAN. QazAqparat - QR Densaýlyq saqtaý mınıstri Eljan Birtanov medıtsınalyq qural-jabdyq shyǵaratyn qazaqstandyq «BARK Tehnolodjı» kásipornyna bardy, dep habarlaıdy QazAqparat DSM baspasóz qyzmetine silteme jasap.

Álemde ókpeni jasandy jeldetý apparaty jetispeı jatqan kezde QR Densaýlyq saqtaý mınıstrligi qazaqstandyq kásiporyndarǵa otandyq medıtsına jabdyǵyn shyǵarýdy usyndy. «BARK Tehnolodjı» kompanııa osy jazda elimizdegi jansaqtaý bólimderine ózi jasaǵan ókpeni jasandy jeldetý apparaty legin jetkizýdi kózdep otyr.

Kompanııa málimetinshe, konstrýktor bıýrosy birneshe jyldan beri osy salada mamandandyrylǵan sanattaǵy apparatty jobalaýdy júrgizip keledi. Ony shyǵarý 2021 jylǵa josparlanǵan. Alaıda jahandyq pandemııa jáne daǵdarys kezinde ony shyǵarýdy bir jylǵa jyldamdatý jóninde sheshim qabyldanǵan.

Bas konstrýktor bóliminde bolashaq ókpeni jasandy jeldetý apparatynyń týrbınasynyń jumysy men aýa jiberý úrdisi mınıstrge eýropalyq ÓJA óndirýshi lıder kásiporynnyń jabdyǵymen salystyryla otyryp kórsetildi.

Eljan Birtanov jasalatyn taýar sapasy boıynsha medıtsına mamandarynyń talabyna sáıkes kelse jáne ımport balamalaryna qaraǵanda baǵasy tómen bolsa otandyq óndirýshini qoldaýǵa ázir ekenin aıtty.