Birtanov: Mınıngokokk juqtyrǵan qyzdy qabyldamaǵan aýrýhana mınıstrlik buıryǵyn buzǵan
Aıta keteıik, búgin mınıstr Almatyǵa jumys saparymen kelgen bolatyn.
«Medıtsınalyq kómek kórsetý jaıyna kelsek. Iá, Premer-Mınıstr tarapynan da syn aıtyldy. Oblystan kelgen naýqastardy qabyldamaý týraly problema burynnan bar. Bul jerde QR DSM medıtsınalyq qyzmet kórsetý týryly buıryǵy buzylǵan. Aýyr naýqastar shuǵyl túrde jaqyn arada ornalasqan aýrýhanaǵa jetkizilýi kerek. Naýqastyń jaǵdaıy turaqtanǵan soń ǵana basqa mekemege aýystyrýǵa ruqsat etiledi. Adamdar turǵylyqty mekenjaıy túgili azamattyǵyna qaramastan jaqyn aýrýhanaǵa jetkizilýi tıis», - dedi mınıstr.
Onyń aıtýynsha, naýqastardy em-domǵa jatqyzýǵa qatysty Densaýlyq saqtaý basqarmasy óziniń ishki buıryǵyn qabyldaǵan. E.Birtanov mınıstrlik pen basqarmanyń qujaty nelikten sáıkespeıtindigin aıta almady.
«Jalpy óńirlik densaýlyq saqtaý basqarmasynyń jumysyn qanaǵattanarlyqsyz dep sanaımyn. Aýrýhanalar men jedel járdemniń jumysyn uıymdastyrý úshin ár terrıtorıaldy birlik óziniń ishki buıryǵyn shyǵarady. Ózderińiz bilesizder, Almatyda shekarany belgileý óte qıyn. Bul másele negizi burynnan bar. Sheshimi izdestirilip jatyr. Jańa buıryqqa sáıkes ózgeris nege engizilmegeni tekseriletin bolady», - dedi mınıstr.
Eske salaıyq, Almaty oblysynda menıngokokk juqpasynan kóz jumǵan 19 jastaǵy boıjetkendi jedel járdem Talǵar qalasynan Qaskeleńge jetkizbek bolǵan. Qyz eki saǵatqa sozylǵan jolda kóz jumdy.
Jedel járdemniń jumysyn qalyń kópshilik synǵa alǵan edi.
Sondaı-aq, muny Úkimet otyrysynda Premer-Mınıstr Baqytjan Saǵyntaev ta mınıstr Eljan Birtanovtyń betine basqan bolatyn. Aıtylǵan syn-pikirden soń mınıstr Almaty aımaǵyna resmı saparmen shyqqan edi.
Vedomstvo basshysy óńirdegi birqatar juqpaly aýrýlar jáne klınıkalyq aýrýhanalardy aralap, jaı-kúıin tekserdi.
Mınıstr sonymen qatar, Qaskeleń juqpaly aýrýlar aýrýhanasyn jabý týraly sheshim qabyldanatynyn aıtty.
Al aýrýhananyń bas dárigerin kásibı biliktiliginiń tómendigine baılanysty ákimshilik jazaǵa tartýdy usyndy.