Birtanov medıtsınalyq saqtandyrýdyń olqylyǵyn sheshti

ASTANA. QazAqparat - Memleket basshysy Nursultan Nazarbaev ózin-ózi jumyspen qamtyp júrgenderdi mindetti áleýmettik medıtsınalyq saqtandyrýdan tys qaldyrmaýǵa tapsyrma bergen. Sebebi osy sanattaǵy azamattar jarna tólemese, birqatar medıtsınalyq qyzmetterdi ala almaıdy, dep xabarlaıdy QazAqparat tilshisi.

«Memleket basshysynyń tapsyrmasyna sáıkes, biz medıtsınalyq saqtandyrý máselelerin taǵy bir márte talqylap shyqtyq. Qazirgi kezde Úkimetke de, Parlamentke de atalǵan júıeni tıimdi engizýge arnalǵan usynystardy daıyndap jatyrmyz. Shyny kerek, ózin-ózi jumyspen qamtyp júrgenderge qatysty problema bar. Ony Prezıdent te atap ótken. Biz olardy medıtsınalyq saqtandyrýdan tys qaldyra almaımyz. Jańa júıege qatyspaǵany úshin medıtsınalyq kómektiń keıbir túrlerin bermeýge de quqymyz joq. Alaıda olar da medıtsınalyq saqtandyrýǵa belsene atsalysýy qajet. Osyǵan baılanysty biz usynystardy daıyndadyq. Jaqyn arada sonyń barlyǵyn Elbasynyń qaraýyna engizemiz», - dedi QR Densaýlyq saqtaý mınıstri Eljan Birtanov búgin QR Prezıdenti janyndaǵy Adam quqyqtary jónindegi komıssııanyń keńeıtilgen otyrysynda.

Mınıstrdiń oıynsha, aldaǵy ýaqytta ózin-ózi jumyspen qamtyp júrgen azamattardy tirkeý sharalaryn qolǵa alý qajet. Sóıtip, olardy el ekonomıkasyn damytýǵa ǵana emes, medıtsınalyq saqtandyrý júıesin iske asyrýǵa da tartqan jón.