Birtanov MÁMS-ti engizý baǵytynda atqarǵan jumysy jaıynda Úkimetke esep berdi
«1 shildeden bastap mindetti áleýmettik medıtsınalyq saqtandyrýdy engizý boıynsha densaýlyq saqtaý reformasy bastaldy. Mindetti áleýmettik medıtsıalyq saqtandyrýdyń zańnamalyq bazasyn jetildirý aıasynda mindetti «Áleýmettik medıtsınalyq saqtandyrý týraly» zańnamaǵa birqatar ózgeristi engizýdi kózdeıtin zań qabyldandy. Áleýmettik medıtsınalyq saqtandyrý qoryna jeke kásipkerlerden jarnalar men jumys berýshilerden aýdarymdar túse bastady. Qazaqstannyń 16 óńirinde qordyń fılıaldary qurylyp, olardyń basshylary taǵaıyndaldy», - dedi ol.
Birtanovtyń aıtýynsha, mindetti áleýmettik medıtsınalyq saqtandyrýdy engizý jónindegi komıssııa Densaýlyq saqtaý mınıstrligi deńgeıinde qurylǵan. Komıssııa quramyna 14 memlekettik organ men múddeli uıymdardyń ókilderi kirdi. Oblystardyń, Almaty, Astana qalalary ákimdikteriniń qatysýymen komıssııanyń tórt otyrysy ótkizildi. MÁMS aıasynda memlekettik organdardyń ózara is-qımyl máseleleri aqparattyq túsindirý jumysynyń barysynda qaraldy.
«MÁMS engizý táýekelderi men basqarý máseleleri jónindegi keshendi vedomstvoaralyq is-sharalar jospary ázirlenip, bekitildi. Jospar 14 táýekeldi qamtıdy jáne mynadaı 4 bólimnen turady. Birinshi - memlekettik jáne jergilikti atqarýshy organdar júrgizetin aqparattyq túsindirý jumysy. Ekinshisi - mindetti áleýmettik medıtsınalyq saqtandyrý júıesiniń qarjylyq turaqtylyǵyn qamtamyz etý. Úshinshisi - aqparattyq júıelermen olardy ıntegratsııalaý. Al tórtinshisi - normatıvtik-quqyqtyq aktilerdi daıyndaý. Árbir táýekel boıynsha nysanaly toptar men táýekelderdi joıý boıynsha qajetti is-sharalar belgilendi. Ortalyq jáne jergilikti atqarýshy organdardyń ishinen jaýapty oryndaýshylar bekitilgen», - dedi Eljan Birtanov.