Birneshe jyljymaıtyn múlki bar adamǵa sán-saltanat salyǵyn salý qarastyrylýda

NUR-SULTAN. QazAqparat – Elimizde birneshe jyljymaıtyn múlki bar azamattarǵa sán-saltanat salyǵyn salý máselesi qaralyp jatyr. Bul jaıynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Birneshe jyljymaıtyn múlik ıeleri úshin salyq engizý máselesi qarastyrylyp jatyr. Eger adamnyń 10-15 nysany bolsa, onda ol kóbirek tóleýi tıis bolar. Bul máseleniń barlyǵy tyńǵylyqty qarastyrylyp, talqylanady», – dedi mınıstr Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.

Sonymen qatar ol avtomobıl markasy sán-saltanat salyǵyn belgileý úshin ólshemshart retinde qaralmaıtyndyǵyn, onyń quny eskeriletindigin atap ótti.

«Týra markasy boıynsha qaralady dep oılamaımyn. Menińshe, avtombıldiń quny qarastyrylady. Bul másele de Salyq kodeksi aıasynda qoǵamdastyqpen, bıznespen, sarapshylarmen talqyǵa túsedi. Shartty túrde aıtar bolsam, quny 100 myń, 150 myń dollardan, tipti odan da joǵary qunynan bastalýy múmkin. Qandaı da gradatsııa bolatyn shyǵar. Dál osy jaıt jyljymaıtyn múlikke de qatysty. Biraq ol joǵary baǵalanady. Sebebi ol jyljymaly múlikke qaraǵanda qymbat baǵalanady», – Álibek Qýantyrov.

Foto: ortcom.kz