Birneshe tildi erkin bilý - búgingi ómir talaby – Vladımır Shnaıder
«Qazaq ǵasyrlar qoınaýynan únemi «qoı ústine boztorǵaı jumyrtqalaǵan» zamandy ańsaǵan, jurty úshin «jeruıyqty izdegen» halyq. Búgingi Qazaqstan halyq arman etken jeruıyqtyń besigi men kindigine aınalýy tıis. Ol – ata-baba armany, keıingi urpaqqa amanaty. Al bizder men sizderdiń mindetimiz osy joldaǵy Prezıdentimizdiń bastamalaryna qoldaý jasap, árbirimiz qazaq elin dostyq pen birliktiń beıbitshiliktiń tiregi men ultaralyq kelisimniń besigine aınaldyrý jolynda barynsha eńbek etip úlesimizdi qosý bolsa kerek», - dedi Vladımır Shnaıder Nur-Sultan qalalyq Qazaqstan halqy Assambleıasynyń HH sessııasynda.
Sonymen qatar ol bir tildi ǵana meńgerip qoımaı, birneshe tildi erkin bilý búgingi ómir talaby ekendigin basa aıtty.
«Osy qaǵıdany ustana otyryp, bolashaq urpaqty qazaq tilinde sóıleýge, kúndelikti ómirde qazaq tilin qoldanýǵa shaqyrý da sizder men bizderdiń basty mindetimizdiń biri ekenin kún tártibinen shyǵarýǵa bolmaıtynyn aıtqym keledi. Sonaý HІH ǵasyrda qazaq mádenıeti men tilin zerttegen Eýropa ǵalymdary túrkitanýshylar V.Radlov, P. Melıoranskııler «túrki tilderiniń ishinde eń taza til – qazaq tili» ekenin, al qazaq tili biliminiń negizin qalaýshy A.Baıtursynov «túrki tilin HH ǵasyrǵa deıin azdyrmaı, qaz qalpynda saqtap kelgen alǵys pen abyroı qazaqqa tıis» dep asa qundy baǵa bergen qazaq tili qazaqstandyqtardyń ortaq tili bolýy tıis. Jastarymyzdyń boıyna qazaq tiliniń qyr-syryn, baılyǵy men eń asyldaryn sińirý arqyly biz óskeleń urpaqtyń biregeıligin qalyptastyra alamyz», - dedi Vladımır Shnaıder.