Birneshe otbasy úıindi astynda qalýy múmkin – Depýtat oralmandar baspanasy týraly

NUR-SULTAN. QazAqparat – Aqmola oblysyndaǵy oralmandarǵa arnalǵan «Nurly kósh» shaǵynaýdanynda baspana sapasy syn kótermeıdi. Bul jóninde Májilis depýtaty Turǵyn Syzdyqov Premer-Mınıstr Asqar Mamınge depýtattyq saýal joldady, dep habarlaıdy QazAqparat tilshisi.

«Táýelsizdiktiń alǵashqy jyldary memlekettiń shaqyrýymen alys jáne jaqyn shet elderden tarıhı Otanyna qonys aýdarýshylardy jaıǵastyrý máselesin sheshý qajet. Birinshiden, «Nurly kósh» aýyly qarapaıym qurylys standarttaryna saı kelmeıdi. Kóptegen ǵımarattyń qabyrǵasy juqa, gıpsokartonmen jasyrylǵan, irgetasy álsiz. Qabyrǵany boılaǵan jaryq sýyq ótkizip qana qoımaı, adam ómirine de qaýip tóndiredi. Birneshe otbasy úıindi astynda qalýy múmkin. Oǵan turǵyndardyń jyl saıynǵy jóndeý jumystary da kómektespeıdi. Bul «qustyń úıshikteri» turatyn jer emes. Turǵyndar osyndaı «jaılylyq» úshin qymbat kommýnaldyq jáne arendalyq tólem jasap otyr. Áli kúnge deıin olardy jer telimderimen birge menshikke berý joldary qarastyrylmaǵan», - dedi depýtat Májilistiń jalpy otyrysynda.
Onyń aıtýynsha, qurylysqa bólingen respýblıkalyq bıýdjet qarajatyn bireýler jymqyrdy degen qaýeset júr.
«Bul qaýesetti teriske shyǵaratyn negiz joq. Sebebi turýǵa jaısyz bul aýyldy úkimettik komıssııa 20 jyl buryn qabyldaǵan. Turǵyndarǵa saltanatty túrde kilt tabystaǵan. Sybaılas jemqorlyqqa qarsy kúres aıasynda nysandardy qabyldaǵan sheneýnikterdi anyqtap, aty-jónin jarııalaý qajet. Zańǵa sáıkes jaýapkershilik artý kerek», - dedi ol.
Osyǵan baılanysty «Halyq kommýnısteri» fraktsııasynyń depýtattary Premer-Mınıstrden arnaıy úkimettik komıssııa quryp, máseleni túbegeıli sheshý sharalaryn qarastyrýdy surady.