«Birlik» telearnasy otbasylyq ári oıyn-saýyqtyq formatta bolýy tıis - N. Nııazova

ALMATY. QazAqparat- «Birlik» telearnasy otbasylyq ári oıyn-saýyqtyq formatta bolýy tıis. Búgin Almatyda Dostyq úıinde jańa memlekettik «Birlik» telearnasyn qurý boıynsha ótken dóńgelek ústel barysynda Qazaqstan tatarlarynyń «Eldash» gýmanıtarlyq damý ortalyǵynyń tóraıymy Núrııa Nııazova osyndaı pikir bildirdi.

Dóńgelek ústelge jınalǵan etnomádenı birlestikterdiń ókilderi jańa memlekettik telearna qurý máselelerin jan-jaqty talqylady.

«Jańa memlekettik telearna qurý ıdeıasy Qazaqstan halqy Assambleıasynyń ótken jyly Astana qalasynda qarasha aıynda ótken medıa-forýmynda alǵash ret kóterilgen edi. Búgingi talqylaý sonyń jalǵasy ispettes. Onyń ústine Elbasy 2015 jyldy - Qazaqstan halqy Assambleıasynyń jyly dep jarııalaǵany barshaǵa málim. Qazaqstan halqy Assambleıasynyń qamqorlyǵy aıasynda jańa telearna qurýǵa degen qajettilik qazir úlken! Qazaqstan kópultty memleket. Biz ultaralyq tatýlyqty kókseımiz. Olaı bolsa, nege jańa formatta telearna ashpasqa? Onda ultaralyq dostyqty, birlikti jáne Qazaqstanda turatyn halyqtardyń mádenıetin, tilin pash etýge bolady. Sondaı-aq, elimizde qanshama ınternatsıonaldyq januıalar, Qazaqstannyń órkendep damýyna úles qosqan qanshama ataqty tulǵalar bar! Mine, solar jaıynda qyzyqty, tanymdyq, taǵylymdyq baǵdarlamalar jasaýǵa bolady. Bul jerde árbir ult óz mádenıetin, tilin, dástúrin pash etýge daıyn! Al bul óte mańyzdy. Bul telearnada sonymen qatar, sonaý Keńes zamanynda ulttyq kınostýdııalar túsirgen tamasha kınotýyndylardy da kórermen nazaryna usynýǵa bolady» - dedi óz sózinde Núrııa Nııazova. Búgingi dóńgelek ústelge jınalǵan etnomádenı birlestikterdiń ókilderi jańa bastamany biraýyzdan qoldady. Sonymen qatar, qatysýshylar jańa telearnanyń kommertsııalyq múmkindigi de bolýy kerektigin atap ótti. «Óıtkeni sonda ǵana tyń, qyzǵylyqty, kórýge turarlyq baǵdarlamalar jasaýǵa bolady», - deıdi olar.

Jańa telearna 2015 jyly qurylýy yqtımal. Qatysýshylardyń pikirinshe, onda memlekettik tilmen qatar, 33 tilde habar taratylýy múmkin. ıAǵnı, Almaty qalasynyń Qazaqstan halqy Assambleıasynyń bazasynda tirkelgen 33 etnomádenı birlestikke kóp jaýapkershilik arttyrylmaq.

Endi etnomádenı birlestikterdiń ókilderinen quralatyn jumys toby Qazaqstannyń óńirlerin aralap, osy taqyrypta dóńgelek ústelder ótkizbek nıette. Keıin barlyq usynys, pikirler qorytyndy qujatqa jazylyp, Qazaqstan Prezıdentiniń Ákimshiligine tabystalmaq.