Birlik kúni Nursultan Nazarbaev Tramppen órbitken áńgimesin eske aldy

ASTANA. QazAqparat - Qazaqstan Prezıdenti Nursultan Nazarbaev Astanadaǵy «Qazaq eli» monýmenti aldynda ótken merekelik kontsertte halyqty Birlik kúnimen quttyqtady, dep habarlaıdy QazAqparat tilshisi.

«Qurmetti astanalyq aǵaıyn! Búkil qazaqstandyqtar! Barshalaryńyzdy búgingi ulyq merekemiz - Qazaqstannyń Birlik meıramymen shyn júrekten quttyqtaımyn! Ata-babamyzdan «Birlik bar jerde tirlik bar» degen sóz qalǵan. Tirlik degen sóz - adamnyń aman bolýy, tirlik degen sóz - eńbek, eńbek arqyly baıyp, sol arqyly memleketti qoldap, órkendep, ósý degen sóz. Biz taǵdyrdyń talqysyna túsken halyqpyz. Osylaı keń baıtaq Otanymyzda kóp ult pen ulystyń adamdary jınalyp, bir qazannyń ishindegideı qaınap, birlik pen eńbektiń arqasynda osyndaı dárejege jettik», - dedi Prezıdent.

Memleket  basshysy birliktiń arqasynda memleket qurǵanymyzdy atap ótti.

«Birliktiń arqasynda bizdiń birligimizden búkil dúnıe úlgi alatyndaı dárejege jettik. Bizdiń birligimizdiń arqasynda memleketimizdi órkendetip, ósirdik. Ekonomıkany kóterdik. Jyl saıyn halyqtyń ál-aýqatyn jaqsartýǵa jumys istep jatyrmyz. Keshegi meniń bes bastamam birinshiden halyqqa baspana berip, ekinshiden salyqty tómendetý, úshinshiden jastarǵa jataqhana, jańadan memleket arqyly múmkinshilik berý, shaǵyn bıznesti damytyp, aýyldyń adamdaryn kóterý. Osynyń barlyǵy nege bolyp jatyr? Birligimizdiń arqasynda!» - dedi ol.

Nursultan Nazarbaev sonymen qatar, bir jaıdy eske aldy.

«Bizdiń birligimizdiń arqasynda búkil dúnıe bizdi syılaıdy. Barlyq dinder kelip bizdiń elimizde ǵana jınalady. Janjaldasqandardyń tabysýy bizde júzege asady. Ózderińiz bilesizder, osy qańtarda Amerıkada saparmen boldym. Ol eldiń prezıdenti Donald Tramp menen surady. Tramp myrza óziniń áriptesterimen ary jaqta otyrdy da, biz ber jaqta otyrǵanda menen: «Senderdiń qaı eldermen janjaldaryń bar?» dep surady. Men sonda Qazaqstannyń eshqandaı elmen janjaly joqtyǵyn aıttym. Biz barlyǵyn syılaımyz, bizdi de barlyǵy syılaıdy. Sonda Tramp: «Qarashy Qazaqstannyń eshkimmen janjaly joq. Al bizdiń tóńiregimizdiń bári janjal» dedi. Sondyqtan Alla bizdi osydan eshýaqytta aıyrmasyn. Birlikten aıyrmasyn. Otyz eldiń qataryna osy birliktiń arqasynda jetemiz. Urpaǵymyz bizge rıza bolatyn bolady», - dep túıdi Prezıdent.

Eske sala ketsek, búgin Prezıdent Nursultan Nazarbaev Astanada halyqtyq serýenge qatysty.