Birligimizge bekem, jaqynymyzǵa demeý bolaıyq – Dýlatı ýnıversıtetiniń rektory

TARAZ. QazAqparat – Taraz qalasyndaǵy M. H. Dýlatı ýnıversıtetiniń rektory, Qazaqstannyń eńbek sińirgen qaıratkeri Mahmetǵalı Sarybekov Memleket basshysynyń elimizdegi ahýalǵa baılanysty úndeýine pikir bildirdi, dep habarlaıdy QazAqparat tilshisi.

«Kúni keshe Memleket basshysy koronavırýs indetiniń aýyrtpalyǵy men elimizde qolǵa alynǵan sharalar jaıynda kezekti úndeýin joldady. Osyndaı qıyn kezeńde bir-birimizge qoldaý kórsetý – mańyzdy. 5 shildeden bastap elimizde karantın sharalary qaıta kúsheıgeni barshańyzǵa málim. Bul indetpen kúresý úshin qajetti qadam boldy. «Jaqynyńa janashyr bol» degen ustanymdy barsha aqparat kózi jarysa jarııalap jatyr. Bul degenimiz – ózińdi oılamasań da ózgeniń ómirine qaýip tóndirme degeni. Iá, osy bir qaýipti dertten talaı adam jaqynynan aıyrylyp, qara jamyldy. Qaıǵydan qan jutqan árbir jan úshin qabyrǵamyz qaıysyp qaıǵyramyz. Memleket basshysy COVID-19 indeti men pnevmonııa saldarynan dúnıe salǵandardyń jaqyndaryna kóńil aıtyp, 13 shildeni Ulttyq aza tutý kúni dep jarııalady. Osylaısha, ómirden ozǵan azamattarymyzdyń rýhyna qurmet kórsetilýi durys dep esepteımin», - deıdi rektor.

Sonymen birge, spıker aýyr kezeńde jyǵylǵanǵa judyryq bolǵan jaǵdaılar da azaımaı turǵanyn atap ótti.

«Biri jalǵan aqparat taratsa, biri qoldan qymbatshylyq týdyrady, endi biri – bar dári-dármekti joq etip, tapshylyq jasap otyr. Bul halqymyzǵa aýyr tıip, kóńilge kúdik pen qorqynysh uıalatady. Memleket basshysy keshegi sózinde osyndaı zańsyzdyqqa barǵan azamattar zań júzinde jazalanatynyn jetkizdi. Sondaı-aq, el ishin «Osylaı emdelý kerek, myna dárini ishý kerek» degen nebir aqparat kezip júr. Mundaı jalǵan málimetter de zardap shektirýi múmkin. Ár adamnyń aǵzasy ár túrli. Birine qonǵan em endi birine keri áser berýi múmkin. Bul týraly da Prezıdent óz oıyn jetkizgen bolatyn. Kúdik pen qorqynysh, belgisizdik pen sharasyzdyq ár adamǵa aýyr áser etedi. Bul qorqynysh aýrýdan da kúshtirek áser etetin syńaıly. Osy tusta ár adam óz isine, árbir sózine jaýapty ekenin sezinýi kerek. Dýlatı ýnıversıteti ujymy atynan barshańyzdy indetpen kúresýdi jalǵastyrýǵa shaqyramyn. Bul dertti qarqyndy kúrespen, aýyzbirshilikpen jáne qatań tártippen ǵana jeńemiz. Dertti túbi jeńermiz, jaqsy kúnge de jetermiz. Ol úshin bizge birlik, yntymaq, qajyr-qaırat qajet. Elimiz aman, baýyrymyz bútin bolsyn», - dedi M. Sarybekov.

Eske sala ketsek, keshe QR Prezıdenti Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jasady. Óz sózinde Prezıdent 13 shildeni Ulttyq aza tutý kúni dep jarııalady.