Birligimizdi bekemdeı bilsek, eldigimizdi saqtap qalamyz - Prezıdent
«Dostyq peıil, meıirimdilik jáne janashyrlyq – eń asyl qasıetter. Qazaqta «Syılassań – syıly bolarsyń» degen sóz bar. Aǵaıynnyń tatýlyǵy men janashyrlyǵy – el birliginiń túp qazyǵy. Eldiń tutastyǵy qarapaıym adamdardyń ózara túsinistiginen bastalady. Halqymyz bárin de aqyl-parasatpen sheshken», - dedi Memleket basshysy prezıdenttikke Qasym-Jomart Toqaevtyń kandıdatýrasyn qoldaý jónindegi halyqtyq koalıtsııanyń forýmynda.
Prezıdent bul dástúrdi umytpaýymyz kerektigin basa aıtty.
«Aǵa býyn osy ıgi dástúrdi nasıhattaýy qajet. Jalpy, ortaq jetistikter ulttyń mereıin ósiredi. Biz bir-birimizge qashanda tilektes bolýymyz qajet. Talapty, daryndy azamattardy qoldaı bilýimiz kerek. Ár otandasymyzdyń tabysyna qýanyp, qıyndyqtardy birge eńserýge tıispiz. Halqymyz «Uıymdasqan utady» dep beker aıtpaǵan. Birligimizdi bekemdeı bilsek, eldigimizdi saqtap qalamyz. Sonda ǵana Ádiletti Qazaqstandy quramyz. Demokratııa, zań ústemdigi jáne teńdik qaǵıdattary saqtalatyn myqty memleket bolamyz. Bul bizdiń qolymyzdan keledi. Sebebi, aıqyn maqsatymyz, naqty baǵdarymyz bar. Jasampaz jáne otanshyl halqymyz bar. Táýelsiz eldiń oıy erkin, rýhy azat urpaǵy ósip keledi. Biz túbegeıli ózgeristiń bárin óskeleń urpaqtyń bolashaǵy úshin jasap jatyrmyz. Barshańyzdy elimizdi birge kórkeıtýge shaqyramyn! Óıtkeni, bizdiń Otanymyz – bir, memleketimiz – bir, halqymyz – bir», - dedi Qasym-Jomart Toqaev.