Birlesken ınvestıtsııalyq jobalardy iske asyrý ekonomıka men áleýmettik salany ınfraqurylymdyq turǵydan jańǵyrtýǵa baǵyttalýy tıis - G. Ábdiqalyqova

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Dúnıejúzilik banktiń Qazaqstandaǵy Turaqty ókili Lıýdmıla Býtenkomen kezdesti, dep habarlady Aqordanyń baspasóz qyzmetinen.

Kezdesýge Bilim jáne ǵylym mınıstri A.Sárinjipov jáne Ulttyq ekonomıka vıtse-mınıstri M.Ábilqasymova qatysty.
G.Ábdiqalyqova Memleket basshysynyń «Nurly Jol - bolashaqqa bastar jol» atty Qazaqstan halqyna Joldaýynda kórinis tapqan jańa ekonomıkalyq saıasattyń maqsat-mindetterimen sáıkestendirilýi tıis birlesken ınvestıtsııalyq jobalardy oıdaǵydaı iske asyrýdyń mańyzdylyǵyn atap ótti.

Memlekettik hatshy birlesken ınvestıtsııalyq jobalardy iske asyrý ekonomıka men áleýmettik salany ınfraqurylymdyq turǵydan jańǵyrtýǵa baǵyttalýy tıis ekenin aıtty. Qazaqstanda bilim ekonomıkasyn qalyptastyrý úshin ǵylymı áleýetti kúsheıtý, ınnovatsııalyq jobalar sheńberinde bilim men tehnologııa transfertin jedeldetý, ulttyq ınnovatsııalyq júıe men onyń negizgi ınstıtýttarynyń tıimdiligin arttyrý qajet.

Kezdesý barysynda taraptar Dúnıejúzilik Bank men Qazaqstan arasyndaǵy áriptestik týraly negizdemelik kelisimge sáıkes, 2014 jylǵy qyrkúıekte qabyldanǵan Yntymaqtastyq baǵdarlamasyn iske asyrýǵa qatysty birqatar máselelerdi talqylady.
Kezdesý qorytyndysynda adam kapıtalyn damytý, ǵylym men ınnovatsııany yntalandyrý, eńbek naryǵynyń talaptaryna saı keletin eńbek daǵdylaryn damytý jónindegi birlesken jobalar boıynsha yntymaqtastyqty tereńdetý týraly ýaǵdalastyqqa qol jetkizildi.