Birqatar JOO oqytýshylary qostanaılyqtarǵa birkúndik jalaqysyn aýdardy
«Búgingi ǵylymı halyqaralyq shara - Ahmet Baıtursynuly jáne onyń murasyna arnalǵan keshendi sharanyń biri ǵana. Ult ustazynyń 150 jyldyq mereıtoıyna oraı týǵan jeri Qostanaı óńirine Memleket basshysynyń sapary josparlanyp, Ahmet Baıtursynulyna arnalǵan aýqymdy shara ótýi kerek edi. Ókinishke qaraı, atalǵan aımaqta órt shyǵyp, jaǵdaıdy estip-bilip jatyrsyzdar. Soǵan baılanysty josparlanǵan shara keıinge qaldy», - dedi QR Ǵylym jáne joǵary bilim mınıstri Saıasat Nurbek elordada ótip jatqan Ahmet Baıtursynulynyń murasyna arnalǵan ǵylymı-praktıkalyq halyqaralyq konferentsııada.
Sondaı-aq, mınıstr Qostanaıdaǵy tótenshe jaǵdaı boıynsha ǵalymdar men joǵary oqý oryndarynyń oqytýshylary beıjaı qalmaǵanyn tilge tıek etti.
«Bizdiń joǵary oqý oryndary Qostanaıdaǵy jaǵdaıǵa baılanysty birlesip, qoldaý kórsetip jatyr. Birqatar JOO-lardyń janynan jedel shtab quryldy. Nátıjesinde 10 tonnadan astam azyq-túlik jınalyp, qostanaılyqtarǵa jónetildi. Odan bólek, joǵaryda atalǵan jáne taǵy birqatar óńir ýnıversıtetteriniń oqytýshylary ózderiniń birkúndik jalaqysyn Qostanaıǵa kómek retinde bólip otyr. Joǵary bilim qostanaılyqtarmen birge, qoldan kelgenshe qoldaý kórsetemiz», - deıdi ol.
Buǵan deıin habarlaǵanymyzdaı elordada Ahmet Baıtursynulynyń mol murasyna arnalǵan «Ahmet Baıtursynulynyń ǵylymı murasy jáne Qazaqstannyń zııatkerlik sabaqtastyǵy» atty ǵylymı-praktıkalyq halyqaralyq konferentsııa ótip jatyr.
Eske sala ketsek, Qostanaı oblysynda 5 aýyldyń mańynda orman órtine qarsy kúres júrip jatyr.