Birqatar óńirdi tsıfrlyq teleradıo habaryn taratýǵa kóshirý keıinge shegeriledi

ASTANA. QazAqparat – Elimizdiń birqatar óńirlerin tsıfrlyq efırlik teleradıo habarlaryn taratý formatyna kóshirý isi keıinge shegerilmek. Tıisti buıryqtyń jobasyn Mádenıet jáne aqparat mınıstrligi ashyq talqyǵa shyǵardy, dep habarlaıdy QazAqparat tilshisi.

«Qazaqstan Respýblıkasynda tsıfrlyq efırlik teleradıo habarlaryn taratýdy engizý jáne damytý» jobasyn odan ári iske asyrý belgili bir sebeptermen merzimderdi uzartýdy talap etedi. Máselen, metaldyń quny edáýir joǵary boldy, aılyq eseptik kórsetkish mólsheri ózgerdi, sáıkesinshe qurylys-montajdaý jáne iske qosý-baptaý jumystarynyń quny ósti, valıýta baǵamy kóterildi. Bul - teledıdar taratqyshtary, mýltıpleksteý jabdyqtary, marshrýtızatorlar, antenna júıeleri jáne ózge de sheteldik óndiristiń barlyq tehnologııalyq jabdyqtarynyń qymbattaýyna ákeldi. Sondaı-aq, iske asyrý merzimin uzartýdyń mańyzdy negizgi sebepteriniń biri - «Qazteleradıo» AQ óz qarajaty esebinen jobany aıaqtaý qajettigi. Osylaısha qazirgi ýaqytta qarjylyq-ekonomıkalyq negizdemeni túzetý jáne bekitý jáne jańa jobalaý-smetalyq qujattamany bekitý boıynsha jumys júrgizilip jatyr» delingen buıryqta.

Atalǵan máselelerge baılanysty birneshe oblystaǵy eldi meken turǵyndary tsıfrlyq televızııa ıgiligin taıaý arada kóre qoımaıdy.

Naqty toqtalsaq, Abaı, Qyzylorda, Atyraý, Aqmola, Aqtóbe, Shyǵys jáne Batys Qazaqstan oblystaryndaǵy aýyldardy tsıfrlyq efırlik teleradıo habarlaryn taratýǵa 2025 jyldyń sońyna deıin tolyq kóshirý josparlanǵan.

Buǵan deıingi josparda bul jumystyń bári 2024 jyldyń 1 jeltoqsanyna deıin aıaqtalýy tıis bolatyn.

Buıryq jobasy 21 qyrkúıekke deıin kópshilik talqylaýda bolady.