Birqatar óńirdegi basshylar jemqorlyq kúdigine ilindi
16:12, 24 Qazan 2019
NUR-SULTAN. QazAqparat – 23 qazanda elimizdiń birqatar óńiriniń basshylyq quramy jemqorlyq kúdigine ilindi. Bul týraly QazAqparat Agenttiktiń baspasóz qyzmetine silteme jasap habarlaıdy.
Shymkent qalasynyń sybaılas jemqorlyqqa qarsy qyzmetimen saýda jasaýǵa ruqsat berý jáne kásipkerlik qyzmetke jalpy qamqorlyq jasaý úshin azamattan 65 myń teńge alý kúdigi boıynsha Ál-Farabı aýdany ákimdigi kásipkerlik bóliminiń basshysyna qatysty sotqa deıingi tergeý bastaldy.
Osyǵan uqsas qylmys jasaǵany úshin Túrkistan oblysy Jetisaı aýdany Qyzylqum selolyq okrýgynyń ákimi kúdikti boldy.
Ol jeke turǵyn úı qurylysyna jer telimin berý úshin azamattan 500 myń teńge somasynda para aldy degen kúdikke ilindi.
Sotqa deıingi tergeý jalǵasýda. Kúdiktilerge qatysty sońǵy sheshimdi olardyń kináliliginiń deńgeıin anyqtaı otyryp, sot shyǵarady.