Birqatar óńirde jer ýchaskeleri sý qorǵaý beldeýlerinen berilgen
«Sý basý sebepterin aldyn ala taldaý turǵyn úılerdi sý basý sebepteriniń biri olardy tómen jatqan bólikterde salý nemese sý qorǵaý beldeýleriniń aýmaqtarynda bolýy ekenin kórsetti. Sý kodeksiniń 145-1-babyna sáıkes 2009 jylǵy 1 shildeden keıin sý qorǵaý beldeýleriniń shekaralary sheginde ǵımarattar men qurylystar salýǵa jol berilmeıdi. Bul rette, olardy paıdalanýǵa uıymdasqan ortalyqtandyrylǵan káriz nemese lastanǵan sarqyndy sýlardy burý men tazartýdyń ózge júıesi bolǵan kezde ǵana jol beriledi. Osyǵan qaramastan, elimiz boıynsha 2009 jyldan keıin salynǵan 2 144 úı (Atyraý oblysy 1 573 úı, Astana qalasy 543 úı, Qyzylorda oblysy 24 úı, Qaraǵandy oblysy 4 úı) bar. Olarda 9 722 turǵyn turady. Sonymen qatar, Aýyl sharýashylyǵy mınıstrligi Jer resýrstaryn basqarý komıtetiniń Jer resýrstaryn basqarý jónindegi aýmaqtyq departamentteri prokýratýra organdarymen birlesip, sý qorǵaý beldeýleri men aımaqtary sheginde jer ýchaskelerin berýdiń zańdylyǵyna tekserý is-sharalaryn júrgizedi», - dedi Úkimet basshysynyń birinshi orynbasary jaýabynda.
Máselen, onyń dereginshe, 2022 jyly Atyraý qalasy ákimdigi Jaıyq ózeniniń sý qorǵaý beldeýleri sheginde jer ýchaskelerin berýdiń zańdylyǵyna jospardan tys tekserý júrgizdi. Nátıjesinde 17 jer ýchaskesiniń zańsyz resimdelgeni anyqtaldy. 2023 jyly Atyraý qalasynyń ákimdigi men jer qatynastary bólimine jospardan tys tekserý júrgizildi. Qorytyndysynda 9 jer ýchaskesiniń sý qorǵaý aýmaqtary saqtalmaı berilgeni anyqtaldy. Tekserý qorytyndysy boıynsha Atyraý qalasynyń ákimdigi men jer qatynastary bólimine tıisti buzýshylyqtardy joıý týraly nusqama joldandy.
«Júrgizilgen egjeı-tegjeıli taldaý nátıjeleri boıynsha Qaraǵandy qalasynda Kishi Buqpa ózeniniń sý qorǵaý aımaqtary men beldeýleriniń sheginde ornalasqan úıler anyqtaldy. Qazirgi ýaqytta osy fakti boıynsha sot rásimderi júrgizilýde. Mańǵystaý oblysy boıynsha Jer resýrstaryn basqarý komıtetiniń departamenti Kaspıı teńiziniń sý qorǵaý beldeýinen tys jerlerge jer ýchaskelerin berýdiń zańdylyǵyna qatysty taldamalyq jumys júrgizdi. Taldaý jumysynyń nátıjeleri boıynsha Aqtaý qalasy men Munaıly aýdanynyń ákimdikterine qatysty sotqa berilgen jer ýchaskelerin memleket menshigine, Aqtaý qalasyndaǵy «Caspian Plaza» JShS jáne Munaıly aýdanyndaǵy jeke tulǵalarǵa qaıtarý boıynsha talap aryzdar jiberildi. Qazirgi ýaqytta osy fakti boıynsha sot rásimderi júrgizilýde», - dedi Roman Sklıar.
--