Birqatar óńirde ákimdik jetim balalardyń járdemaqysyn bermeı, baspanasyna kóz tikken

ASTANA. QazAqparat - Oqý-aǵartý mınıstrliginiń bala quqyǵyn qorǵaý komıteti júrgizgen profılaktıkalyq baqylaýdyń nátıjesinde 300-ge jýyq jetim jáne ata-ana qamqorlyǵynsyz qalǵan balanyń quqyǵy qalpyna keldi. Olar jalpy somasy 2,5 mln teńgeden astam járdemaqy almaǵan, dep habarlaıdy QazAqparat.

Bala quqyǵyn qorǵaý komıtetiniń tekserisinen keıin kámeletke tolmaǵandarǵa tólenbegen járdemaqy qaıtaryldy.

«Bul másele ákimdikterdiń quzyryna jatady. Biraq bizdiń komıtet jaǵdaıdy baqylaýda ustap otyr. Tártip pen zańdylyqty qalpyna keltirý – bizdiń basty mindetimiz. 1 sáýirden bastap járdemaqy men basqa da áleýmettik tólemderdi esepteý úshin AEK 3 063 teńgeden 3 180 teńgege deıin óskenimen, járdemaqy eski AEK boıynsha tólenip kelgen. Járdemaqy mólsheriniń aıyrmashylyǵy qamqorshylardyń shotyna jiberildi. Osylaısha jetim balalardyń quqyǵy qorǵaldy»,– deıdi bala quqyqtaryn qorǵaý komıtetiniń tóraǵasy Nasymjan Ospanova.

Tekserý kezinde basqa da kemshilikter anyqtaldy.

Mysaly, jetim balalardy baspana kezegine qoıý merzimi saqtalmaǵan.

Qamqorshylardyń, patronat tárbıeshilerdiń esep berýine jáne jetim balalardyń jyljymaıtyn múliginiń saqtalýyn qamtamasyz etýge tıisti baqylaý júrgizilmegen.

Anyqtalǵan zańbuzýshylyqtar boıynsha komıtet sáıkessizdikti joıý jóninde nusqama berdi.

Birqatar basshy men maman 30 AEK kóleminde aıyppul túrinde ákimshilik jaýapqa tartyldy.