Birqatar medıtsınalyq analız nátıjeleri onlaın usynylmaq

ASTANA. QazAqparat – Endi qazaqstandyqtar medıtsınalyq analızderdiń nátıjesine onlaın qol jetkize alady. Búginde barlyq medıtsınalyq taldaý nátıjelerin servıske engizý boıynsha jumys júrip jatyr. Bul týraly Densaýlyq saqtaý vıtse-mınıstri Beıbit Esenbaev málim etti, dep habarlaıdy QazAqparat tilshisi.

«Bizdiń mınıstrlik Tsıfrlyq damý jáne aeroǵarysh ónerkásibi mınıstrligimen birlesip egov Mobile mobıldik qosymshasynda «eDensaulyq» servısin iske qosty. Onda donorlyq mártebe, elektrondyq retseptter, medıtsınalyq qarsy kórsetilimder, júkti áıelderdi esepke alý jáne dıspanser, emdeýge jatqyzý, zerthanalyq taldaýlar nátıjeleri jáne aýrýhana paraqtary boıynsha keńeıtilgen aqparat usynylǵan. Mysaly, «Jalpy aqparat» bóliminde patsıenttiń qaı medıtsınalyq uıymǵa tirkelgeni, ýchaskesi jáne dáriger toltyrǵan derektermen tanysýǵa bolady», – dedi Beıbit Esenbaev ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha atalǵan qyzmet arqyly patsıenttiń mindetti áleýmettik medıtsınalyq saqtandyrý júıesindegi mártebesi jáne sońǵy ret tólemniń qashan jasalǵanyn kórýge bolady.

«Sonymen qatar, endi patsıentter medıtsınalyq taldaýlardyń nátıjesine onlaın qol jetkize alady. Barlyq medıtsınalyq analız nátıejelerin servıske engizý boıynsha jumys júrgizilýde. eDensaulyq servısi derbes medıtsınalyq derekterge qol jetkizýdiń biryńǵaı kózi jáne nátıjege jyldam qol jetkizýge múmkindik beredi. eDensaulyq» servısiniń aıasy kezeń-kezeńimen keńeıe túsedi. Jaqyn arada qan toby jáne basqa da aqparattar qosylady», - deıdi ol.