Birqatar kompanııanyń 200 mlrd teńge aktıvi memleketke qaıtaryldy

NUR-SULTAN. QazAqparat – Birqatar kompanııanyń 200 mlrd teńge aktıvi memleketke qaıtaryldy, dep habarlaıdy QazAqparat tilshisi.

«Monopolııasyzdandyrý aıasynda «Qazaqtelekom» AQ (28,75%), «Kóliktik servıs ortalyǵy» AQ (100%), «Akmolıt» JShS (100%) tárizdi jáne basqa da kompanııalardyń aqshalaı qarajaty men aktsııalary memleketke berildi. Osy aktıvterdiń aldyn ala somasy – shamamen 200 mlrd teńge», - delingen Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi komıssııa taratqan aqparatta.

Komıssııanyń atap ótýinshe, qazirgi ýaqytta jekeshelendirý, memlekettik aktıvterdi olıgopolııalardyń paıdasyna ıelikten shyǵarý týraly 8 myńǵa jýyq Úkimet aktilerin jáne sot sheshimderin prokýratýra organdary zerdelep jatyr. Olardyń keıbireýleri boıynsha prokýrorlyq den qoıý sharalary qabyldandy jáne naqty nátıjeleri de bar.