Birinshi jáne ekinshi qabatta turatyn turǵyndar nelikten lıft úshin aqsha tóleıdi
«Olar da aqsha tóleıdi. Sebebi úıdiń menshigi bar. Bólý múmkin emes. Eger tólemeıdi desek, endeshe birinshi qabattan qasbetti bólip alaıyq nemese shatyr máselesi tek joǵary qabattaǵylardyń problemasy deıik. Osy zańnamaǵa saı, baspaldaq, qasbet, shatyr, ınjenerlik kommýnıkatsııalardyń bári de – úıge ortaq menshik ekeni naqtylanǵan», - dedi Qaıyrbek Óskenbaev OKQ-da Turǵyn úı kommýnaldyq sharýashylyǵy máseleleri boıynsha zańdy túsindire otyryp.
Vıtse-mınıstrdiń aıtýynsha, úılerdiń birinshi qabatynda kóbinese dúkender, salondar men meıramhanalar ashylyp jatady.
«Dúken nemese meıramhanaǵa ıesi bolsyn – turǵyndar sekildi kondomınıým múshesi ekenin shegelep aldyq. Turǵyndardyń sheshimi boıynsha olarǵa qosymsha tólemder de júktelýi múmkin. ıAǵnı, siz bir sharshy metr úshin 20 nemese 30 teńge tóleseńiz, bıznes ıelerine turǵyndardyń sheshimi boıynsha kóbirek tólem júktelýi múmkin», - dedi ol.
Qaıyrbek Óskenbaevtyń túsindirýinshe, lıft de úıge ortaq. Tıisinshe, turǵyndar qabattaryna qaramastan, ortaq múlik úshin tóleýi tıis.