Birinshi toptaǵy múmkindigi shekteýli adamdarǵa qosymsha áleýmettik járdemaqy beriledi
«Erekshe qajettilikteri bar adamdardy qoldaýdy kúsheıtý jáne olardy ekonomıkalyq ómirge aralastyrý boıynsha sharalar iske asyrylady. Jumyspen qamtylǵan múgedektigi bar adamdardyń úlesi 2020 jylǵy 23 paıyzdan 2025 jyly 30 paıyzǵa deıin artady», - dedi A. Mamın.
Onyń aıtýynsha, osy jyly múgedektigi bar adamdardyń 80 paıyzy qajetti tehnıkalyq quraldarmen jáne ońaltý qyzmetterimen qamtamasyz etiledi, al 2025 jyly barlyq muqtaj adamdar tolyǵymen qamtylady.
«Únemi kútimdi qajet etetin jáne jeke kómekshiniń qyzmetterin paıdalanbaıtyn birinshi toptaǵy múgedektigi bar azamattardyń barlyǵyna 1,4 eń tómengi kúnkóris deńgeıi mólsherinde qosymsha áleýmettik járdemaqy beriletin bolady. 5 jyldyń ishinde bul maqsattarǵa 73,2 mlrd teńge bólinedi», - dedi Premer-Mınıstr.
Onyń sózine qaraǵanda, 2021 jyly múgedektigi bar adamdardy jumysqa ornalastyrý, psıhologııalyq jáne quqyqtyq kómek kórsetý máseleleri boıynsha 15 ortalyq ashylady.