Birinshi toqsanda aýyl sharýashylyǵy salasy boıynsha Aqmola oblysynda joǵary ósim boldy

NUR-SULTAN. QazAqparat – Aýly sharýashylyǵy boıynsha 13 óńirde oń serpin baıqalyp otyr. Bul týraly Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Aýyl sharýashylyǵynda 2,8 paıyz deńgeıinde turaqty ósý baıqaldy. 13 óńirde oń serpin baıqalyp otyr. Mal men qus eti, sút óndirýdiń artýy esebinen Aqmola oblysy eń joǵarǵy ósýdi kórsetti», - dedi mınıstr Úkimet otyrysynda bıylǵy qańtar-naýryzdaǵy qorytyndylardy baıandaı kele.

Onyń aıtýynsha, atalǵan salada tómendeý Atyraý jáne Soltústik Qazaqstan oblystarynda tirkeldi.

«7 ekonomıkalyq kórsetkish boıynsha óńirlik bólinistegi jalpy jaǵdaı toqtalsaq, 6 kórsetkish boıynsha oń ósim Almaty jáne Shyǵys Qazaqstan oblystarynda baıqaldy. 5 kórsetkish boıynsha 6 óńir oń ósim kórsetti. Olar Aqmola, Aqtóbe, Jambyl, Qaraǵandy, Qostanaı oblystary, sondaı-aq Shymkent qalasy. 7 óńirde 4 kórsetkish boıynsha ósý tirkeldi. Bul ortasha deńgeı. 2 óńirde 3 kórsetkish boıynsha oń ósý baıqaldy. Bul rette, saýda boıynsha oń aımaqqa Almaty oblysynan basqa, Shyǵys Qazaqstan, Atyraý oblystary endi», - dedi Á. Erǵalıeev.