Birinshi respýblıkalyq alaman báıge týrnıriniń jeńimpazy 10 mln. teńgege ıe bolady

ASTANA. QazAqparat - 14 qyrkúıekte Astana mańynda ótetin birinshi respýblıkalyq «Altyn tulpar» alaman báıgesi týrnıriniń jeńimpazy 10 mln. teńgege ıe bolady. Bul týraly búgin Qazaqstan ulttyq sport túrleri qaýymdastyǵynyń prezıdenti Bekbolat Tileýhan týrnırge arnalǵan brıfıng barysynda málim etti.

Onyń sózine qaraǵanda, týrnır «Nur Otan» partııasynyń 15 jyldyǵyna oraılastyryldy. Oǵan Qazaqstannyń barlyq aımaǵynyń shabandozdary qatysady. «Jeńimpaz 10 mln. teńgege qol jetkizedi. Júldegerler de baǵaly syılyqtarǵa ıe bolady. Ár oblystyń namysyn qorǵaıtyn jylqynyń sany 10-nan aspaýy tıis. Sondyqtan 160 jylqy qatysýy múmkin. Alaıda ázirge Almaty men Aqmola oblystary ǵana 10 jylqydan qatystyratynyn aıtty. Al ózge oblystar 3-4 jylqyny tirkedi. Tizim tolyq qurylmady. Qatysýshylardyń barlyǵy kelgen joq. Týrnır ulttyq sport túrlerine áýes jandardyń qyzyǵýshylyǵyn týdyryp, jyl saıyn uıymdastyrylatyn jaqsy dástúrge aınalady degen úmittemin», - dep qosty ol.

«Sońǵy kezderi dástúrli qazaq báıgesi damymaı otyr. Negizinen mundaı jarystarǵa barlyǵyna belgili býdandastyrý jolymen alynǵan aǵylshyn taza qandy jylqy tuqymy qatysady. Bizdiń jylqylar ázirge olarmen básekelese almaıdy. Sondyqtan dástúrli qazaq báıgesi men jylqylarymyzdy nasıhattaý maqsatynda 43 shaqyrymdyq úlken alaman báıge uıymdastyrdyq. Jarys tegistelmegen, tabıǵı jolda bolmaq. Myqtysy bas júldege ıe bolady», - dedi B.Tileýhan.

Osy shara aıasynda «at synshysy» baıqaýy ótedi dep atalyp ótildi. Bul baıqaý boıynsha marapattaý «Tolybaı synshy», «Kúreńbaı synshy», «Keıhaýys synshy» atalymdary boıynsha júzege asady.

Týrnırdi «Nur Otan» partııasy jáne «Samuryq-Qazyna» UÁQ» AQ qoldaýymen QR ulttyq sport túrleri qaýymdastyǵy jáne QR mádenıet jáne sport mınıstrligi uıymdastyrdy.