Birinshi lıgada «Aqjaıyq» fýtbol klýby «Tarazdy» oısyrata utty

ORAL. QazAqparat – Fýtboldan birinshi lıga komandalary arasynda el chempıonatynyń 12-týrynda Oraldyń «Aqjaıyǵy» óz alańynda «Tarazdy» qabyldady, dep habarlaıdy QazAqparat tilshisi.

2022 jyly premer-lıgada óner kórsetken qos komanda da bıylǵy maýsymda jankúıerler kóńilinen shyǵa almaı keledi.

Ótken týrda kútpegen jerden syrt alańda «Jas Qyranǵa» 0:4 esebinen oısyraı utylǵan oraldyqtarǵa sheginer jer joq edi.

Bul joly qazaqstandyq maman Igor Prohnıtskııdiń shákirtteri «Taraz» qaqpasynyń kiltin taba bildi. Ýkraınalyq legıoner Mıkola Agapov 37-inshi jáne 57-mınýtta mergendik tanytty. 65-mınýtta armenııalyq Zaven Badoıan esepti 3:0-ge jetkizdi. Oral fýtbolynyń túlegi, tájirıbeli Meıram Sapanov 87-mınýtta match núktesin qoıdy.

Osylaısha, qarsylasyn 4:0 esebimen tize búktirgen oraldyqtar 22 upaımen týrnır kestesinde tórtinshi orynda keledi. Kósh basyndaǵy Semeıdiń «Elimaıy» (29 upaı) men ekinshi oryndaǵy Túrkistannyń «Turany» (28 upaı) qalǵan komandalardan edáýir uzap ketti. Olardy qýyp jetip, premer-lıgaǵa joldama alý qıynǵa túsetini anyq. Oǵan qosa 24 upaıy bar astanalyq «Jeńis» úzdik úshtikti túıindep tur.

Kelesi týrda 29 maýsymda Túrkistanda «Turanmen» ótetin kezdesý «Aqjaıyq» úshin asa mańyzdy bolmaq.

Eske sala keteıik, budan buryn fýtboldan birinshi lıgada «Aqjaıyqtyń» iri eseppen jeńiske jetkenin jazǵan bolatynbyz.

Sondaı-aq Ronaldý ulttyq qurama sapynda 200 ret alańǵa shyqqan tuńǵysh fýtbolshy atandy.