Birinshi lıgada Aqjaıyq astanalyq Jeńispen teń tarqasty

ORAL. QazAqparat - Fýtboldan birinshi lıga komandalary arasynda el chempıonatynyń kezekti týrynda Oraldyń «Aqjaıyǵy» óz alańynda astanalyq «Jeńisti» qabyldady, dep habarlaıdy QazAqparat tilshisi.

Qos komanda týrnır kestesinde quıryq tistesip, úshinshi-tórtinshi orynda kele jatqandyqtan, bul oıyn mańyzdy edi.

Match bastalysymen-aq 2-mınýtta qonaqtar sapyndaǵy gambııalyq shabýylshy Pa Omar Djoýb esep ashty. Degenmen, 31-mınýtta «Aqjaıyqtan» ýkraınalyq legıoner Mıkola Agapov tarazy basyn teńestirdi - 1:1.

Ekinshi kezeńde esep ózgergen joq.

Osylaısha, «Jeńis» burynǵysha úzdik úshtikti túıindese, oraldyqtar tórtinshi orynda qaldy.

«Aqjaıyq» kelesi kezdesýin Shymkentte 10 tamyz kúni «Qyranmen» ótkizedi.

Eske sala keteıik, budan buryn «Aqjaıyqtyń» «Han Táńiri» komandasymen teń oınaǵanyn jazǵan bolatynbyz.