Birinshi lıgada «Aqjaıyq» alǵashqy jeńisine qol jetkizdi

ORAL. QazAqparat – Birinshi lıga komandalary arasynda fýtboldan Qazaqstan chempıonatynyń ekinshi týrynda Oraldyń «Aqjaıyǵy» alǵashqy jeńisine qol jetkizdi, dep habarlaıdy QazAqparat tilshisi.

Qazaqstandyq maman Igor Prohnıtskıı jattyqtyratyn oraldyqtar Ekibastuzda jergilikti klýbpen sheberlik baıqasty.

Birinshi taımda «Aqjaıyqtan» Meıram Sapanov 30-mınýtta óz komandasyn alǵa shyǵarsa, alań ıelerinen Stnelı Nkobı tarazy basyn teńestirdi.

Ekinshi kezeńde kópke deıin teń nátıje saqtalyp turdy. Tek Zaven Badoıandy aıyp alańynda qulatqany úshin «Ekibastuz» qaqpasyna penaltı belgilendi. 78-mınýtta 11 metrlik núkteden Evgenıı Kobzar múlt ketken joq. Úsh mınýttan keıin E.Kobzar aıyp dobyn dál oryndap, match núktesin qoıdy – 3:1.

I.Prohnıtskıı Ekibastuzda fýtboldyń jaqsy damyǵanyn, tartysty oıynda shákirtteriniń asyǵy alshysynan túskendigin jetkizdi.

Premer-lıgaǵa shyǵýdan taǵy bir úmitker komanda – «Taraz» syrt alańda «Turkistan» klýbyn 5:0 esebimen tize búktirdi.

Oraldyq klýb endi el kýboginiń 1/8 fınaldyq matchyn ótkizý úshin Almatyǵa attanady. Onda 19 sáýir kúni «Qaıratpen» jasyl alańǵa shyǵady.

Eske sala keteıik, budan buryn fýtboldan birinshi lıgada «Aqjaıyq» pen «Elimaı» komandalarynyń teń tarqasqanyn jazǵan edik.