Birinshi kezekte Jer kodeksiniń moratorııge qatysty máselelerin qaraý kerek – Aqylbek Kúrishbaev
«Ekonomıkalyq máseleler boıynsha jumys tobynyń otyrysyna aýyl sharýashylyǵy maqsatyndaǵy jerlerdi tek Qazaqstan azamattaryna berý máselesi qaraldy. Bul másele kún tártibinen alynyp tastaldy, sebebi ol boıynsha Memleket basshysynyń naqty saıası sheshimi bar. Bul problema zań sheńberinde sheshiledi, ıaǵnı aýyl sharýashylyǵy maqsatyndaǵy jerler tek qazaqstandyq azamattarǵa beriledi», - deıdi ekonomıkalyq jumys tobynyń basshysy Aqylbek Kúrishbaev.
Onyń aıtýynsha, aýyl sharýashylyǵy jerlerin paıdalanbaǵany úshin salyqty kóterý máselesi de kún tártibinen alynyp tastaldy.
«Sebebi bul másele boıynsha 2020 jylǵy 10 jeltoqsanda salyq mólsherlemesin jıyrma eselengen mólsherde kóterýdi kózdeıtin tıisti zań qabyldandy. Sondyqtan atalǵan máseleni Muhtar Taıjannyń usynysymen komıssııanyń qaraýynan alyp tastap, keıin birińǵaı agrarlyq salyqty qarastyrý aıasynda talqylaý usynyldy. Bul usynys jumys toby múshelerinen qoldaý tapty. Qazirgi ýaqytta jer máselesine qatysty kóp suraq kelip jatyr, ony qaraýǵa uzaq ýaqyt qajet. Qazirgi ýaqytta birinshi kezekte Jer kodeksiniń tek moratorııge qatysty máselelerin qarasaq degen usynysym bar. Óıtkeni jańa zań jobasyn qabyldaýǵa úlgermeı qalýymyz múmkin», - deıdi ol.