Birinshi basshynyń mańyndaǵy basy artyq qyzmetshilerdi qysqartamyz - QR bilim jáne ǵylym mınıstri
Mınıstr Ashat Aımaǵambetov JOO rektorlary men bilim basqarmalarynyń basshylaryna jańa oqý jylynda qandaı negizgi jumystar jasalý kerektigin aıtty.
«Mınıstrliktiń birinshi basshysynyń qyzmetin qamtamasyz etetin shtattar sanyn qysqartý kerek. Qysqartý zań aıasynda júretin bolsyn. Olarǵa basqa jumys usynamyz nemese eńbek zańnamasy boıynsha aldyn ala eskertip, tıisti sharalar qabyldaımyz», - dedi ol.
Ol sondaı-aq, Qazaq gýmanıtarlyq zań ýnıversıtetiniń janynan qurylǵan Jobalar ofısiniń jumysyna úkimettik emes uıym ókilderin belsendi qatystyrý kerektigin aıtty.
«Biz bul ofıske úkimettik emes uıym ókilderin shaqyryp otyrmyz. Bilim salasy boıynsha kórsetiletin memlekettik qyzmetterdi qaıta qurmaqpyz. Sol boıynsha usynystar qabyldaýǵa daıynbyz. Mınıstrliktiń barlyq bıznes-protsesteri boıynsha jemqorlyq kórsetkishine aýdıt júrgizemiz. Bir protsestiń nege sonsha uzaqqa sozylatynyn, oǵan syrttan aralasý derekteri bar-joǵyn anyqtaımyz», - degen Ashat Aımaǵambetov jemqorlyqpen kúres boıynsha jańa strategııa qabyldanatynyn eskertti.
«Jemqorlyqqa qarsy jańa strategııa jasaımyz. Aı saıyn osy másele boıynsha esep tyńdalatyn bolady. Joǵary oqý oryndarynyń, ǵylymı-zertteý ınstıtýttarynyń, bilim basqarmalarynyń basshylary bul máselege basymen jaýap beredi. Qajet bolsa, qyzmetinen bosatamyz. Bilim basqarmalarynyń basshylaryn oblystyq ákimdik taǵaıyndaǵanymen, mınıstrlik olardy qyzmetinen bosatýǵa quzyretti ekenin esterińizge salamyn», - dedi vedomstvo basshysy.