Birikken Arab Ámirlikterinde aqparattyq kommýnıkatsııa tehnologııalarynyń eń iri kórmesi óz jumysyn bastady
QR Kólik jáne kommýnıkatsııa mınıstrliginiń málimetinshe, álemge tanymal AKT- brendteriniń 80%-dan astamy atalǵan kórmede óz ónimderin kópshilik nazaryna usynady. 77 elden kelgen memlekettik organdar basshylary, AKT-qaýymdastyqtar, tehnologııalyq jáne bıznes-kompanııalar sońǵy tehnologııalyq sheshimdermen tanysyp, aqparattyq kommýnıkatsııa salasyndaǵy jańa tendentsııalardy talqyǵa salady.
Halyqaralyq elektrobaılanys odaǵynyń (ITU) shaqyrtýymen atalǵan sharaǵa Qazaqstan da qatysyp, elektrondyq úkimetti qurýdaǵy jetistikterimen bólisetin bolady. Atap aıtqanda, «egov.kz» portaly, «elektrondyq lıtsenzııalaý», «E-notarıat» jáne «HQKO» jobalary kórmege qatysýshylar nazaryna usynylady.
Atalǵan shara barysynda Kólik jáne kommýnıkatsııa vıtse-mınıstri Sáken Sarsenov basshylyq etetin qazaqstandyq delegatsııa «Qazaqstan Respýblıkasynda aqparattyq qoǵamdastyqty qurý jáne elektrondyq úkimetti damytý: tájirıbe men jetistikter» taqyrybynda ólkelik semınar ótkizedi.
Aıta keteıik, GITEX kórmesiniń tolyq ataýy - Gulf Information Technology Exhibition. GITEX Technology Week - Parsy shyǵanaǵy óńiriniń aqparattyq tehnologııalar aptasy, ıaǵnı aqparattyq kommýnıkatsııalyq tehnologııalar (AKT) jáne elektronıka salasyndaǵy sońǵy jetistikter boıynsha bedeli joǵary kórme bolyp tabylady. Atalǵan kórme 1981 jyldan bastap jyl saıyn ótkizilip otyrady. 2011 jyly GITEX TECHNOLOGY WEEK kórmesine qoıylǵan eskpozıtsııalardyń aýmaǵy 65 000 sharshy metrge sozyldy.
Kórmege dástúrli túrde baǵdarlamalyq qamtýlardy óndirýshiler, jelilik jáne telekommýnıkatsııa jabdyqtaryn ázirleýshiler, baılanys qyzmetin usynýshylar, IT salasyndaǵy iri qarjy jáne memlekettik mekeme ókilderi men provaıderler, mamandar qatysady.