Birikken Arab Ámirlikteri Qazaqstan taýarlaryn ımporttaýǵa qyzyǵýshylyq tanytty

ASTANA. QazAqparat - Birikken Arab Ámirlikterinde ótken Qazaqstannyń saýda-ekonomıkalyq mıssııasy barysynda  qazaqstandyq kásiporyndardyń Dýbaıdaǵy EKSPO-2020 kórmesine qatysýy talqylandy, dep habarlaıdy Qazaqstannyń Syrtqy saýda palatasynyń baspasóz qyzmeti.

Mıssııanyń uıymdastyrýshylary retinde QR Investıtsııa jáne damý mınıstrligi, Dýbaıdaǵy Qazaqstannyń elshiligi, «Atameken» UKP, Qazaqstannyń Syrty saýda palatasy atsalysty.

Mashına jasaý, qurylys, jeńil jáne tamaq ónerkásibi salasyndaǵy iri 12 taýar óndirýshilerinen quralǵan qazaqstandyq delegatsııany Dýbaı men Soltústik Ámirlikterdegi QR Elshisi Madııar Meńilbekov basqardy.

BAÁ tarapynan munaı jáne gaz, qurylys salasyndaǵy 40-tan astam kásiporyn, lızıngtik jáne jeke kólik kompanııalary,  birqatar saýda jelileri qatysty. Seriktester baldy, etti, metall qurastyrylymdy, munaı daıyndaýǵa arnalǵan qural-jabdyqtardy, gaz jáne sýdy, sondaı-aq, qazaqstandyq ónimderdiń basqa da taýarlaryn ımporttaýǵa qyzyǵýshylyq tanytatynyn bildirdi.
 

Ásirese, Petropavl metall qurastyrylymy zaýyty men EKSPO-2020 ókilderi arasynda kelissózder sátti aıaqtaldy.

«GMMOS Qazaqstan» JShS, «Topan» JShS, «Aqtóbe munaı jabdyqtary zaýyty» AQ-nyń qyzmetkerleri iri Dragon oil munaı kompanııasynyń ókilderimen kezdesti.

«Green Shop», «Sun Bee Altai», «DK Premium» jáne Qazaq taǵamtaný akademııasynyń qaramaǵyndaǵy Ulttyq «SHARMAN» paıdaly taǵam ortalyǵynyń ókilderi Birikken Arab Ámirlikteriniń «Carrefour», «Lulu» jáne «Union Coop» syndy iri saýda jelilerine bardy.