Birikken Arab Ámirligine demalýǵa barǵan 126 atyraýlyq elge jetkizildi

ATYRAÝ. QazAqparat – Atyraýǵa charterlik reıspen Birikken Arab Ámirliginen 126 el azamaty oraldy, dep habarlaıdy QazAqparat.

«Bulardyń bári – osy elge demalýǵa barǵan qazaqstandyqtar. Olardyń arasynda Atyraý oblysynan 106 adam bar. Al, 20 adam – kórshiles Aqtóbe, Batys Qazaqstan, Mańǵystaý oblystarynyń turǵyndary. Olardy áýejaıda dárigerler qarsy alyp, barlyǵynyń dene qyzýyn tekserdi. Eshqaısysynan joǵary temperatýra baıqalmady. Sodan soń úılerine jiberildi. Dárigerler olardy meken-jaıynda 14 kún baqylaýǵa alady. Kórshiles oblystarda turatyndardyń meken-jaıyn, baılanys nómirlerin aldyq. Barlyq derekti sol oblystardaǵy áriptesterimizge beremiz», - dedi Atyraý oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Amantaı Jumaǵalıev.