#Birgemiz: Sý jańa beınebaıan kórermenge jol tartty

NUR-SULTAN. QazAqparat - Ánshi Ibragım Eskendirdiń #Birgemiz úndeýine oraı shyǵarǵan ánine beınebaıan túsirildi, dep habarlaıdy QazAqparat tilshisi.

«El basyna kún týǵanda Prezıdentimiz halqymyzdyń saýlyǵyn oılap, tótenshe jaǵdaı jarııalady. Jaǵdaıdy jeke baqylaýynda ustap otyr. Elbasymyz el kásipkerlerlerin biriktirip «Birgemiz» qoryn qurdy, memleketshildik sanany kúsheıtip, yntymaqtasýǵa shaqyrdy. Dál osyndaı syn saǵatta jurttyń judyryqtaı jumylýy, ulttyń myǵym birligi ǵana bizdi qıyndyqtan alyp shyǵady. ıAǵnı, biz sózde de, iste de tatýlyq tanytyp, birge ekendigimizdi ózimizge dáleldegende ǵana myqty memleket, uly ult bolamyz», dep jazdy ánshi Ibragım Eskendir Instagram -daǵy paraqshasynda.

Onyń aıtýynsha, osy ıdeıany tý etken týyndy «Birgemiz» dep atalady. Sazyn Ibragım Eskendir, sózin Syrym Áýezhan jazǵan. Oryndaýshy Ibragım Eskendirdiń ózi.

«Qazaqty kórgim keledi» ánine klıp túsirgen «Habar» agenttigi elimizdiń Aqparat jáne qoǵamdyq damý mınıstrliginiń qoldaýymen az ǵana kúnniń ishinde sý jańa «Birgemiz» ánine arnaıy beınebaıan túsirdi.

«Habarlyq shyǵarmashylyq top: rejısseri Nurserik Qambar, qoıýshy operatory Álibek Álıev, prodıýseri Ásel Tursynǵazına», delingen habarlamada.

Buǵan deıin ánshi Ibragım Eskendir #Birgemiz ánin shyǵarǵanyn habarlaǵan edik.