«Birgemiz: Úmit»: Almatylyq volonterler qandaı jumystar júrgizip jatyr

ALMATY. QazAqparat – «Birgemiz: Umit» atty jalpyulttyq joba volonterlerdi jumyldyrýǵa arnalǵan. Olar joǵalǵan adamdardy izdeýge, zilzala qaýip-qaterin azaıtýǵa, tabıǵı jáne tehnogendik sıpattaǵy tótenshe jaǵdaılardyń saldaryn joıýǵa kómektesedi. Volonterler lıgasynyń Almaty qalasy fılıalynyń jetekshisi Baǵdat Anarbaeva QazAqparat tilshisine megapolıste atqarylyp jatqan jumystar jaıly aıtyp berdi.

Onyń aıtýynsha, almatylyq volonterler qalalyq Tótenshe jaǵdaılar jáne qalalyq polıtsııa departamentiniń ókilderimen únemi kezdesip turady. Sonymen qatar, olar turǵyndar arasynda túsindirý jumystaryn júrgizedi.

«Qazaqstan volonterler lıgasy» QQ eriktileri adamdar kóp jınalatyn jerlerde aldyn alý sharalary men karantındik jaǵdaıda maska rejımin saqtaý týraly aıtyp, túsindiredi. Bizdiń volonterler halyq arasynda taýly aımaqta, tótenshe jaǵdaı kezinde, jeke sektorlarda órt qaýipsizdigi boıynsha profılaktıkalyq jumystar júrgizedi. Biz aptasyna birneshe ret Tótenshe jaǵdaılar departamenti qyzmetkerlerimen birge aqparattyq-túsindirý jumystaryna shyǵamyz. Keste boıynsha barlyq aýdandy qamtımyz. Qorǵanys quraldarymen jabdyqtalǵan 15 volonter atsalysady. Olar karantındik normalardy saqtaı otyryp túsindirý jumystaryn qalaı júrgizý kerektigin biledi», - deıdi Baǵdat Anarbaeva.

Ol Tótenshe jaǵdaılar departamenti qyzmetkerlerimen eki jylǵa jýyq jumys istep jatqandaryn tilge tıek etti.

«Bizde trenıngter ótedi. Aqparat beretin paraqshalar, broshıýralar daıyndaımyz. Onda qaýipsizdik sharalary týraly jazylǵan. Volonterler barlyq jumysty TJD qyzmetkerlerimen birgip júzege asyrady.Ol úshin arnaıy úsh aptalyq oqý kýrsyn oqyp shyqqan. Olardyń qolynda sertıfıkat pen osy baǵytta jumys isteıtindigin rastaıtyn arnaıy beıdjderi bar», - dep qosty spıker.

Sonymen qatar, ol osy joba sheńberinde joǵalǵan adamdardy izdeý jáne tótenshe jaǵdaılar kezinde kómek kórsetý boıynsha is-sharalarǵa qatysatyndaryn atap ótti.

«Bizdiń qyz-jigitter alǵashqy medıtsınalyq kómek kórsetý kýrstarynan ótti. Túrli qaıyrymdylyq aktsııalaryn uıymdastyramyz. Volonterler qan tapsyrý ortalyqtarynda qan tapsyrady»,– dedi ol.

Onyń aıtýynsha, 14 jastan asqan kez kelgen adam volonter bola alady.

«Kámelettik jasqa tolmaǵan eriktiler ata-analarynyń ruqsatymen keledi. Bizde mektep oqýshylary, stýdentter, eresekter, zeınetkerler bar. Bizde aıtarlyqtaı shekteýler joq. Eń bastysy – kómekke umtylý», - dep túsindirdi ol.

«Birgemiz: Umit» jalpyulttyq jobasy Qazaqstan Respýblıkasy Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» KEAQ memlekettik granty sheńberinde iske asyrylady.