«Birgemiz»: Qostanaıdaǵy dıirmen kesheni 2000 otbasyna un jetkizedi

QOSTANAI. QazAqparat – Qostanaıdaǵy «Best Kostanaı» un óndirý kesheni basshylyǵy «Nur Otan» partııasy qolǵa alǵan «Birgemiz» qaıyrymdylyq aktsııasyn qoldady, dep habarlaıdy QazAqparat tilshisi.

Qazaqstanda syrtqa shyǵarylatyn unnyń tórtten biri Qostanaıda óndiriledi. Óńdeý ónerkásibiniń shıkizat óndirýden asyp túsip, ony kóz ushynda qaldyrýyna oblystaǵy un tartatyn dıirmenderdiń qosyp otyrǵan úlesi mol. Solardyń biri – «Best Kostanaı» un óndirý kesheni. Aldaǵy kúnderi un zaýyty 2000 otbasyn qamtamasyz etpek.

«Aldymen Qostanaı, Tobyl qalalary men Zarechnoe, Mıchýrın aýyldaryna bireýi 25 keli bolatyn 1000 qap un jetkizemiz. Keıin Almaty qalasyna qosymsha 1000 qap jiberiledi. Bir qap un bir otbasyna arnalǵan. Osylaısha «Nur Otan» partııasy qolǵa alǵan «Birgemiz» qaıyrymdylyq aktsııasyna qoldaý bildirgimiz keledi», - deıdi un kesheni dırektory Vıdadı ıÝsýbov.

Aıta keteıik, «Best Qostanaı» dıirmen kesheni jańǵyrtýdan ótip, byltyr Elbasynyń qatysýymen ótken telekópirde tusaýyn kesti. Táýligine 700 tonna astyq óńdeıtin qýaty bar dıirmenniń barlyq jumys úderisi kompıýterlendirilgen. Mýltıjúıelik baqylaýdan turady jáne kompıýterlik basqarý óndiriske adamnyń qatysýynsyz avtomattyq rejimde jumys isteýge múmkindik beredi. Elevatorǵa astyqtyń túsýi men un qaltalarǵa salynyp shyqqanǵa deıingi búkil óndiristik tsıkl biryńǵaı kompıýterlik esepte tur. Táýliktiń qaı saǵatynda jáne álemniń kez kelgen núktesinde otyryp, ınternet arqyly dıirmen jumysyn baqylaýǵa bolady.

Un zaýyty Reseı, Ózbekstan, Tájikstan, Qyrǵyzstan jáne Aýǵanstan sııaqty elderge eksportqa shyǵady.