«Birgemiz» qory taǵy 30 myń otbasyǵa aqshalaı kómek kórsetpek
«Keshe Memleket basshysy Qasym-Jomart Toqaev málimdeme jasap, eldiń aǵymdaǵy áleýmettik jáne ekonomıkalyq kún tártibi men memlekettiń daǵdarystan keıingi damýynyń negizgi baǵyttaryn belgiledi. Azamattarymyzdyń ómiri men densaýlyǵynyń bárinen qymbat ekeni eskerile otyryp, tótenshe jaǵdaı rejımin 11 mamyrǵa deıin uzartý týraly sheshim qabyldandy. Prezıdent osyndaı kúrdeli kezeńde eshkimniń nazardan tys qalmaı, barsha muqtaj jandarǵa qoldaý kórsetiletinin atap kórsetti. Máselen, búgingi kúnge deıin 4 mıllıonnan astam adam tikeleı qarjylyq kómek alyp, 570 myńdaı adamǵa azyq-túlik jıyntyǵy úlestirilgen. Jalpy, azyq-túlik sebetimen 1,1 mln adam qamtylyp, 1,6 mln adamnyń kommýnaldyq tólemderiniń merzimi keıinge shegeriletin bolady», - dedi ol.
Baýyrjan Baıbek Memleket basshysy osynaý qysyltaıań shaqta nurotandyqtardyń, belsendiler men volonterlardyń atqaryp jatqan jumystaryn joǵary baǵalaǵyndyǵyn eske saldy. Jasotandyqtar 90 myń muqtaj otbasyǵa azyq-túlik jıyntyǵyn, antıseptık quraldaryn jetkizip bergenin, buǵan qosa elordada, Almaty men Shymkent qalalarynda 100 myń otbasy tegin maskalarmen qamtamasyz etilgenin atap ótti.
«Sonymen birge Elbasynyń bastamasymen qurylǵan «Birgemiz» qory 330 myń muqtaj otbasyǵa 50 myń teńgeden birjolǵy qarjylaı kómek aýdardy. Búgin-erteń taǵy da 30 myńnan astam otbasy qamtylatyn bolady. Uly Jeńistiń 75 jyldyǵy qarsańynda «Birgemiz» qorynan ekinshi dúnıejúzilik soǵystyń 40 myń qatysýshysy men múgedegi, sondaı-aq tyl eńbekkerleri 50 myń teńgeden tólemaqy aldy. 800-den astam ardager men 8 myń tyl eńbekkerine azyq-túlik sebetteri men jeke qorǵanys quraldary jetkizilip berildi. Ardagerlerimizge qoldaý kórsetý jumystary ári qaraı da jalǵasa beredi«,- dedi Baýyrjan Baıbek.
«Nur Otan» partııasy Tóraǵasynyń birinshi orynbasary 24 sáýirde eldiń Tuńǵysh Prezıdenti – Elbasy Nursultan Ábishuly Nazarbaev Qaýipsizdik keńesiniń otyrysynda koronavırýstan keıingi kezeńde bızneske, eń aldymen shaǵyn jáne orta bızneske qoldaý kórsetýge kúsh sala otyryp, ekonomıkany saýyqtyrý sharalaryn qolǵa alýdyń mańyzdylyǵyn atap kórsetkenine nazar aýdartty.
«Osyǵan oraı 11 mamyrǵa deıin ekonomıkalyq damýdy qalpyna keltirý jónindegi keshendi jospar ázirleý josparlanyp jatyr. Úkimet memlekettik qoldaý kórsetiletin kompanııalardyń tizimin jasaýǵa kiristi. Prezıdenttiń tapsyrmasy boıynsha, buǵan shyn máninde mańyzdy jáne júıe quraýshy kásiporyndar enýi tıis. «Nur Otan» partııasy da osy jumysqa atsalysýda. Biz, eń aldymen, shyǵaratyn óniminiń quramynda qazaqstandyq úlesi joǵary jáne qyzmetkerleriniń sany kóp óńdeýshi sala kásiporyndaryna basa nazar aýdarǵan jón dep esepteımiz. Bul rette kásiporyndar úshin «qarapaıym zattar ekonomıkasy», ımportqa táýeldilikti azaıtý aıasynda naqty nysanaly kórsetkishter belgilenýi tıis», - dedi ol.
Baýyrjan Baıbek sondaı-aq, Prezıdent óz málimdemesinde azyq-túlik taýarlarynyń jetkiliktiligi men sapasyna monıtorıng jasaýdyń, eldiń azyq-túlik qaýipsizdigin qamtamasyz etýdiń mańyzdylyǵyn atap kórsetkenine toqtaldy.
«Osyǵan baılanysty «Nur Otan» partııasy óziniń óńirlik jáne aýdandyq fılıaldarynyń jumysyn kúsheıtedi. Jalpy, azamattar men bıznesti qoldaýǵa baǵyttalǵan qarajattyń kólemi 6 trıllıon teńgeni qurady. Bul qarajatty jumsaýdyń tıimdiligi men ashyqtyǵy «Nur Otan»-nyń turaqty qoǵamdyq baqylaýynda bolady. Elimizdiń aldynda ekonomıkany qalpyna keltirý, azamattardy qalypty ómirge qaıta oraltý boıynsha mańyzdy jumystar tur. «Jumyla kótergen júk jeńil» degendeı, bárimiz birlesip barsha qıyndyqtardy eńseretinimizge senimdimin. Eldiń jetekshi saıası kúshi retinde «Nur Otan» partııasy da óziniń búkil áleýetin osyǵan jumyldyrady», - dedi «Nur Otan» partııasy Tóraǵasynyń birinshi orynbasary.