«Birgemiz» qory Myrzakentte 20 úı turǵyzý úshin 340 mln teńge bóldi - Baýyrjan Baıbek

MAQTAARAL. QazAqparat – «Nur Otan» partııasy Tóraǵasynyń birinshi orynbasary Baýyrjan Baıbek tasqynnan zardap shekken maqtaaraldyqtarǵa Elbasynyń sálemin jetkizdi. Aımaq basshysy Ómirzaq Shókeevpen birge Myrzakent aýylynda boı kótergen jańa yqshamaýdannyń bolashaq qonys ıelerimen kezdesip, turǵyndardyń jaǵdaıymen tanysty, dep habarlaıdy QazAqparat tilshisi.

Partııa Tóraǵasynyń birinshi orynbasary Myrzakent kentinde tótenshe jaǵdaıǵa baılanysty qurylǵan shtab otyrysyn ótkizip, tabıǵı apat saldaryn joıý barysyna qanyqty. Otyrys barysynda sóz alǵan Baýyrjan Baıbek topan sýdan zardap shekken aýyldardaǵy ınfraqurylymdyq jelilerdi ıaǵnı jol, aýyz sý, gaz qubyrlaryn qaıta qalpyna keltirý, aýyl sharýashylyǵy taýar óndirýshilerine erekshe qoldaý kórsetý syndy máselelerge aıryqsha mán berýge shaqyrdy. Munan soń Myrzakent kentiniń shyǵys jaq betindegi salynyp jatqan jańa shaǵynaýdanǵa atbasyn burdy. Ondaǵy qurylys jumystarynyń barysymen tanysyp, jańa shaǵynaýdanda partııa atynan 20 úı soǵylatynyn jetkizdi. Alǵashqy úıdiń irgetasyn qalaý rásimine qatysty. ıAǵnı, Elbasynyń bastamasy boıynsha Tuńǵysh Prezıdent Qory men «Nur Otan» partııasy qurǵan «Birgemiz» qory Myrzakent eldi mekenine 20 úı turǵyzý úshin 340 mln teńge bólý týraly sheshim qabyldap otyr. Osylaısha topan sý astynda qalǵan Dostyq aýyly turǵyndarynyń baspana máselesi tolyqtaı sheshilmek. Mundaǵy jumys sapasy avtorlyq jáne tehnıkalyq baqylaý salasyndaǵy mamandardyń qatysýymen, erekshe partııalyq baqylaýda bolatynyn atap ótti.

«Elbasynyń tapsyrmasymen osynda kelip otyrmyn. Erteń ony baıandaıtyn bolamyn. Qaı kúıde ekenderińizdi jaqsy túsinemin. Aıaq astynan bolǵan jaǵdaı, az ýaqyttyń ishinde. Ómirzaq Estaıuly ózi Arysta boldy, basqa da qıyn jaǵdaılarda. Elbasy tapsyrmasy boıynsha Túrkistan qalasy salynyp jatyr. Eń tájirıbeli ákimderdiń biri. Sizder jalǵyz qalmaısyzdar. «Nur Otan» halyqtyń partııasy bolǵandyqtan, biz sizdermen birgemiz», – dedi Baýyrjan Baıbek.

Elbasynyń sálemin estigen maqtaaraldyqtar bir marqaıyp qaldy. Alǵystaryn aıtyp, aq batalaryn berdi.

Aıta keteıik, jańa shaǵynaýdanda aldaǵy eki aıda jańa 505 úı boı kóteretin bolady. Sondaı-aq, munda 1500 oryndyq bilim uıasy men 280 oryndyq balabaqshanyń qurylysy júrgizilmek. Budan bólek, ınfraqurylymdyq qajettilikter: ıaǵnı, jol, sý, gaz qubyrlary tartylyp, sáýleti kelisken shaǵynaýdanǵa aınalmaq.

Baýyrjan Qydyrǵalıuly nazarynan aýyldaryn sý basyp, búginde Atakent kentindegi evakýatsııalyq ortalyqtarǵa jaıǵastyrylǵan Dostyq, Jeńis, Fırdoýsı, Jańaturmys jáne Órgebas aýyldarynyń turǵyndary da tys qalǵan joq. Ondaǵy kezdesý barysynda turǵyndar ózderin tolǵandyrǵan suraqtarǵa jan-jaqty jaýap alyp, «Nur Otan» partııasynyń atqaryp jatqan jumystaryna alǵystyryn bildirdi. Munan soń «Nur Otan» partııasy Tóraǵasynyń birinshi orynbasary Atakent kentinde ornalasqan oblystyq shtabtyń ortalyqtandyrylǵan qoımasyna bardy. Ondaǵy zardap shekken turǵyndarǵa kómek qolyn sozyp júrgen bir top eriktilermen kezdesip, pikir almasty. Olardyń Maqtaaraldaǵy apattyń saldaryn joıý baǵytyndaǵy bastamalaryna rızashylyǵyn bildirdi.