Bireýler úshin bıýrokratııanyń bolǵany tıimdi - Úkimet basshysy

ASTANA. QazAqparat - Úkimettiń búgingi otyrysynda QR Premer-Mınıstri Baqytjan Saǵyntaev salyq jáne keden sharalaryn avtomattandyrýdy «ýaqyt kúttirmeıtin másele» retinde belgiledi. Sebebi búginde Qazaqstan halyqaralyq saýda jaǵynan artta qalyp otyr, dep habarlaıdy QazAqparat tilshisi.

«Doing Business reıtıngisinde biz halyqaralyq saýda boıynsha 189 eldiń ishinde 122-orynda turmyz. Bul - TMD memleketteri ishinde eń tómen kórsetkish. Sondyqtan salyq jáne keden sharalaryn avtomattandyrýdy jyldam atqarý qajet. Ol - ýaqyt kúttirmeıtin úlken ári mańyzdy shara», - dedi Úkimet basshysy.

Baqytjan Ábdiruly aqparattyq tehnologııalardy engizý salasynda áli de biraz kemshilikterdiń bar ekenin jetkizdi. Alaıda ondaı tehnologııalar iske qosylsa, kóp uzamaı, istemeı qalatynyna da basa nazar aýdardy. «Endi, bul jerde adam faktory da bar ekenin umytpaýymyz qajet. Sebebi bireýler úshin bıýrokratııanyń bolǵany tıimdi. Ol bıýrokratııa artynan jemqorlyqqa ulasady. Ásirese, salyq jáne keden salasynda atalǵan másele ózekti bolyp tur», - dep atap kórsetti QR Premer-Mınıstri.

Onyń aıtýynsha, búginde aqparattyq tehnologııalardy engizýge qatysty pılottyq jobalardy uzaqqa sozbaı, keden, salyq jáne taǵy basqa salalarǵan jan-jaqty taratqan mańyzdy.

Aıta keteıik, otyrys barysynda Baqytjan Saǵyntaev tondardy tańbalaý sııaqty sharalardy der kezinde qolǵa alý qajettigin atap ótti. Sebebi bıýdjet mıllıardtaǵan salyqtan qaǵylyp otyr. 

Al QR Qarjy mınıstri Baqyt Sultanov aqparattyq tehnologııalardyń arqasynda qansha qaǵaz únemdeýge bolatynyn jetkizdi.