Bireý aqshańyzdy sheship almaqshy: Petropavl turǵyny alaıaqtyqtyń jańa túrinen zardap shekti
Soltústik Qazaqstan oblysy polıtsııa departamenti baspasóz qyzmetiniń málimetinshe, bul joly alaıaqtardyń quryǵyna 33 jastaǵy áıel túsken.
Kelinshek basqalarǵa eskertý úshin óziniń qalaı aldanyp qalǵanyn aıtyp berdi.
«Bankten» qońyraý soqty. Maǵan bank kartasyna tirkelgen telefon nómirimdi bireýlerdiń aýystyraıyn dep jatqanyn aıtty. Keıin alaıaqtardyń meniń shotyma kirýge tyrysyp jatqanyna, «qorǵanys ornatý» qajettigine sendirdi», - deıdi qala turǵyny.
Áıeldi WhatsApp messendjeri arqyly «robot-chatqa» qosqan.
Alaıaq oǵan óz derekterin daýystap ataýdyń qajeti joq ekenin, tek «robot-chatqa» karta nómirin, qorǵanys ornatý qajet somany jáne syrtqy betindegi úsh tsıfrdy engizýdi suraǵan.
«Maǵan menedjer kodyn kórsetińiz dedi. Men menedjerdiń kodyn bilmeımin, meniń menedjerim kim boldy dep suradym. Ol «kartany aýdaryńyz, artqy jaǵynda úsh san bolýy kerek, bul sizdiń menedjerińizdiń nómiri, ony da daýystap aıtpaı, jazyp jiberińiz» dedi. Men oǵan senip, aıtqanyn oryndadym», - deıdi áıel.
Budan keıin alaıaq derekterdi rastaý úshin áıelge sms arqyly kelgen kodty engizýdi suraǵan.
Bul klıenttiń qarjysyna tolyq qol jetkizýge múmkindik beretin bir rettik qupııa sóz edi.
Kóp uzamaı onyń shotyndaǵy bar soma joǵalyp ketti. Shyǵyn 113 myń teńgeni qurady.
«Bul fakt QR Qylmystyq kodeksiniń 190-baby «Alaıaqtyq» boıynsha sotqa deıingi tergep-tekserýlerdiń biryńǵaı tiziliminde tirkeldi. «Bankten qońyraý» shalynǵan kezde áńgimeni dereý doǵarýdy suraımyz. Eger qarajatyńyzdyń saqtalýyna qatysty kúmán paıda bolsa, bankke qaıta qońyraý shalyńyz nemese bank bólimshesine kelińiz. Qupııa derekterińizdi eshkimge senip aıtpańyz jáne bógde adamdardyń qysymymen aqsha aýdarymdaryn jasamańyz», - deıdi SQO PD krımınaldyq polıtsııa basqarmasynyń bastyǵy Marat Jumalıev.