Biregeı otandyq artefaktiler týraly fılm túsirý qajet - A.Muhamedıuly

ASTANA. QazAqparat - Biregeı otandyq artefaktiler týraly fılm túsirý qajet. Bul týraly búgin QR Parlamenti Májilisindegi Úkimet saǵatynda QR Mádenıet jáne sport mınıstri Arystanbek Muhamedıuly aıtty.

«Bizdiń mýzeılerimizdiń basty problemasy olar tek kórme qyzmetine ǵana negizdelgen. Al búkil álemde murajaı eń birinshi kezekte ǵylymı-zertteý ortalyǵy bolyp tabylady. Bizdiń qazirgi mindetimiz - osynaý álemdik tájirıbeni murajaılarymyzdyń shyn máninde jumysshy organǵa aınalýy úshin óz qyzmetimizge engizý», - dedi ol.

Sonymen qatar A.Muhamedıuly tanymaldyǵyn arttyrý úshin elimizdegi mýzeılerde saqtaýly turǵan biregeı artefaktiler jaıynda fılm túsirý qajettigin basa aıtty.

«Qazirgi tańda Otyrar, Saýran, Taraz syndy tarıhı qalalardy nemese basqa da artefaktilerdi aıtpaǵannyń ózinde «Altyn adam» syndy qazaqstandyq brendke arnalǵan ne derekti fılm, ne kórkem fılm joq», - dedi mınıstr.