Bir jylda neke júzikteri 36 paıyzǵa qymbattady

ASTANA. QazAqparat – Bir jylda el ishinde baǵaly tastar 30 paıyzdan astam qymtbattaǵan, dep habarlaıdy QazAqparat tilshisi.

Energyprom.kz málimetinshe, bir jyldyń ishinde ishki naryqtaǵy neke júzikteriniń baǵasy 36% ósken.

2023 jyldyń qańtar-aqpanynda zergerlik jáne balama buıymdardyń óndiris kólemi aqshaǵa shaqqanda 212 mln teńge bolyp, 2022 jyldyń qańtar-aqpanyna qaraǵanda 6,3% kóterildi.

Óńirler arasynda eń úlken kólem Almaty oblysyna tıesili – 95,4 mln teńge.

Odan keıin Qaraǵandy obylsy (33,4 mln teńge), Astana (24,5 mln teńge), Shymkent (20,5 mln teńge) jáne Shyǵys Qazaqstan oblystary tur.

«Aqpan aıynyń qorytyndysy boıynsha zergerlik buıymdar men saǵattardyń baǵasy 33,2% ósken. Byltyr bul kezeńde baǵa ósimi 6,2% mólsherinde ǵana bolǵan. Altyn neke júzikteri bir jyldyń ishinde 35,6% qymbattaǵan. Bir jyl buryn baǵa ósimi 5,7% bolǵan edi. Ásirese Soltústik Qazaqstan oblysynda baǵa 71,6%-ǵa kóbeıgen. Odan keıin Jetisý (61,7%) ı Almaty (60,1%) oblystary tur. Bir jylda Astana jáne Almaty qalalarynda, Shyǵys Qazaqstan jáne Aqmola oblystarynda altyn neke júziginiń baǵasy 1,5 ese artqan», - dep jazady Energyprom.kz.

Resýrstyń málimetine qaraǵanda, álemde baǵaly tastar saýdasy qysqaryp keledi.

Rapaport agenttiginiń deregi boıynsha, eń iri almaz óndirýshi kompanııalardyń biri De Beers aqpan aıynda satylym kólemin bir jyl burynǵy kórsetkishpen salystyrǵanda 24% qysqartqan.

«Bul kompanııa salmaǵy 0,75 karattan asatyn brılıant baǵasyn túsirgen. Biraq usaq tastardyń baǵasy kerisinshe ósip otyr», - delingen saraptamada.