Bir jylda kınoteatr bıletteri 10% qymbattaǵan

ASTANA. QazAqparat – Jyldyń alǵashqy 6 aıynda shyǵarmashylyq, óner jáne oıyn-saýyq salasynda kórsetilgen qyzmettiń aqshaǵa shaqqandaǵy kólemi 27,1 mlrd teńge bolǵan. Bul byltyrǵy mejeden 24,4% artyq degen sóz, dep habarlaıdy QazAqparat tilshisi.

Energyprom resýrsynyń jazýynsha, bir jyl ishinde eldegi kınoteatrlardyń qyzmet kórsetý quny - 10%, teatrlardyń qyzmet kórsetý quny - 27% qymbattaǵan.

«Jyldyń birinshi jartyjyldyǵynda shyǵarmashylyq, óner jáne oıyn-saýyq salasynda kórsetilgen qyzmetter kólemi 27,1 mlrd teńge boldy. Bul ótken jylmen salystyrǵanda atalǵan salalarda kórsetilgen qyzmettiń qundyq máni 24,4% artyq. Óńirler arasynda qyzmetterdiń eń kóp kólemi el astanasynda baıqaldy – 7,4 mlrd teńge. Ekinshi orynda Almaty qalasy (5,9 mlrd teńge), úshinshi orynda Qaraǵandy oblysy (1,8 mlrd teńge) tur. Al reıtıngtiń eń tómengi satysyndaǵy Almaty oblysynda nebary 81,6 mln teńgeniń qyzmeti usynylǵan», - dep jazady Energyprom.kz.

Portaldyń málimeti boıynsha, alǵashqy jartyjyldyqta aqshaǵa shaqqanda eń kóp qyzmet teatr salasynda kórsetilgen – 13,6 mlrd teńge. Bul byltyrǵy mejeden 25,6% artyq.

Suranysqa ıe qyzmetterdiń úshtigine kontsertter (8,6 mlrd teńge) men ádebı shyǵarmashylyq (1,7 mlrd teńge) kirgen.

«Qazan aıynyń qorytyndysy boıynsha mádenı is-sharalar salasyndaǵy qyzmetterdiń baǵasy bir jylda 14% ósti. Onyń ishinde kınoteatrlardyń qyzmetteri 10,1%, teatr qyzmetteri 26,5% qymbattady.

Óńirler arasynda mádenı is-sharalardyń barlyq túri Aqmola oblysynda qymbattady – jylyna 36,8%. Sondaı-aq, Túrkistan (+27,4%) jáne Atyraý (+26,6%) oblystary óner qymbat óńirlerdiń úshtigine endi.

Kınoteatrlardyń qyzmeti Aqmola oblysynda aıtarlyqtaı qymbattaǵan – bir jylda 50%. Eń eleýsiz qymbattaý Qyzylorda oblysynda tirkeldi - 0,2%. Mańǵystaý oblysynda baǵa byltyrǵy deńgeıde qalsa, Shymkentte 2,8% tómendedi», - dep jazylǵan saraptamada.