Bir jylda qazaqstandyqtardyń tabysy 17 paıyzǵa ulǵaıdy

ASTANA. QazAqparat – Bir jyl ishinde qazaqstandyqtardyń tabysy artty. Onyń ishinde tabystyń 76% eńbekke jaramdy jandarǵa tıesili, dep habarlaıdy QazAqparat Finprom.kz resýrsyna silteme jasap.

Ótken jyldyń úshinshi toqsanynda halyq tabysy 245,5 myń teńgege jetti. Bul aldyńǵy jylmen salystyrǵanda 16,5%-ǵa artyq.

Óńirler boıynsha joǵary tabys elorda halqyna tıesili. Astanalyqtar jan basyna shaqqanda orta eseppen 339 myń teńge jalaqy alady.

Bul ótken jylmen salystyrǵanda 15,7%-ǵa artyq.

Ekinshi orynda Qaraǵandy oblysy - 332,3 myń teńge, demek 21,4% ósim bar.

Kóshbasshylardyń úshtigin ShQO túıindep tur. Atalǵan óńirde jalaqy 312,7 myń teńge, jyldyq ósim - 31,8%.

Eń az tabys Túrkistan oblysynda baıqalyp otyr. Jan basyna shaqqanda nebári 156,4 myń teńge.

Bir jyl burynǵyǵa qaraǵanda 15,6%-ǵa joǵary, alaıda elimiz boıynsha ortasha kórsetkishtiń úshten birinen az.

Qazaqstandyqtar tabystyń kóp bóligin (76,3%) eńbek qyzmetinen aldy - 180,4 myń teńge, bul ótken jylmen salystyrǵanda 21,9%-ǵa artyq.

Onyń ishinde 157,2 myń teńge - jaldamaly jumystan túsken tabys.

Sonymen qatar derbes jumyspen qamtý jáne kásipkerlik qyzmetten túsken tabys - 23,2 myń teńge.

Áleýmettik transfertter bir jylda nebári 3,3%-ǵa, 55,1 myń teńgege deıin ulǵaıdy.

Onyń ishinde 44,8 myń teńge zeınetaqy, 9,1 myń teńge járdemaqy, 1 myń teńge stıpendııa, 239 teńge AÁK (ataýly álemettik kómek) jáne turǵyn úı kómegin qurady.

Odan bólek, elimizde týystary men tanystarynan materıaldyq kómek jáne alıment 6,2%-ǵa, ıaǵnı 5,5 myń teńgege deıin ósti.