Bir jylda qandaı azyq-túlik eń kóp qymbattady

NUR-SULTAN. QazAqparat - Bıyl shilde aıynda elimizde ınflıatsııa jyldyq esepteýde 15%, al bir aıda 1,1% qurady, dep habarlaıdy QazAqparat Ulttyq statıstıka bıýrosyna silteme jasap.

«2022 jylǵy shildede azyq-túlik taýarlarynyń baǵasy ótken jylǵy shildemen salystyrǵanda 19,7% ósti. Sondaı-aq azyq-túlikke jatpaıtyn taýarlarǵa 14,2%, aqyly qyzmetterge 9,2% kóterildi», - delingen habarlamada.

Baǵanyń aıtarlyqtaı qymbattaýy qantqa (qumsheker) – 87,3%, pııazǵa – 71,7% jáne unǵa 36,6% tirkeldi. Al sábiz ben qyzylsha baǵasy kerisinshe, 29,6% jáne 25,2% tómendedi.

Máselen, bir jylda qymbattaǵan azyq-túlik: 87,3% qant, 21,9% kondıterlik ónimder, 71,7% basty pııaz, 21,7% pasterlengen sút, 36,6% un, 20,5% salqyndatylǵan sýsyndar, 33,0% makaron ónimderi, 18,3% jańa pisken jemister, 31,4% jarmalar, 17,9% nan, 28,6% qus eti, 17,0% sary maı, 27,4% toqash jáne un ónimderi, 16,7% shujyq ónimderi, 26,7% qatty irimshik, 16,5% jylqy eti, 24,6% mıneraldy jáne as sý, 14,8% temeki ónimderi, 24,5% qyshqyl sút ónimderi, 13,7% qoı eti, 24,4% keptirilgen jemister men jańǵaqtar, 11,6% kúnbaǵys maıy.

Sondaı-aq Ulttyq satıstıka bıýrosynyń málimetinshe, bıyl shildede (2021 jylǵy shildemen salystyrǵanda azyq-túlikke jatpaıtyn taýarlardyń baǵasy 14,2% qymbattady. Atap aıtqanda, jeke qoldanysqa arnalǵan taýarlar – 26,3%, jýý jáne tazalaý zattary – 23,5%, turmys quraldary – 22,6%, qurylys materıaldary – 20,5%, jıhaz jáne úıge qajetti zattar – 19,1%, avtomobılder– 15,2%, ydys – 14,8%, toqyma buıymdary – 11,5%, farmatsevtıkalyq ónimder 9,7% qymbattady.

Bir jylda aqyly qyzmetter baǵasy 9,2% ósti. Máselen, keshendi demalý uıymdaryna – 19,1%, qoǵamdyq tamaqtandyrý qyzmetterine – 16,8%, densaýlyq saqtaý qyzmetterine – 15%, sanatorıı qyzmetterine – 14,1%, shashtaraz jáne jeke qyzmet kórsetý oryndary qyzmetterine – 13%, qonaqúı qyzmetterine 5,9% ósti. Jolaýshylar kóliginde aqy 5,5% kóterildi.

Bıýronyń Baǵa statıstıkasy departamentiniń dırektory Qýanyshbek Jaqypbekulynyń aıtýynsha, turǵyn úı-kommýnaldyq qyzmetter salasynda tarıfterdiń qymbattaýy da, tómendeýi de baıqalady. «Byltyrǵy shildemen salystyrǵanda ótken shildede elektr qýatynyń quny – 2,4%, qoqys shyǵarý, taratý jelileri arqyly tasymaldanatyn gaz tarıfi 1,8% joǵarylady. Al ortalyqtan jylý berý qyzmetine tarıf 2,3%, ystyq sýǵa 1,3%, sýdy burý úshin 0,5% tómendedi», – deıdi ol.

Aıta keteıik, Ulttyq bıýro aı saıyn ınflıatsııa deńgeıin sıpattaıtyn tutyný baǵalary ındeksiniń kórsetkishin esepteıdi. Jalpy alǵanda 508 pozıtsııa boıynsha qyzmetter men taýarlardyń tarıfi men baǵa ózgerisi baqylanady. Baǵalardy tirkeý barlyq oblys ortalyǵynda, astanada jáne qalalar men aýdan ortalyqtarynyń belgili bir sheńberinde ártúrli menshik nysanyndaǵy saýda jáne qyzmet kórsetý salasy kásiporyndarynyń iriktemeli jelisi boıynsha júrgiziledi.

2022 jylǵy qańtardan bastap, tutyný baǵalarynyń ındeksin eseptegende azyq–túlik taýarlarynyń úlesi – 40,7%, azyq-túlikke jatpaıtyn taýarlar – 30,2%, aqyly qyzmetter – 29,1% qurady.