Bir úıden eki aǵaıyndy «Qazaqstannyń 100 jańa esimi» jobasynan kórindi
Aıta ketsek, búgin Astanada Qazaqstan Respýblıkasynyń Prezıdenti Nursultan Nazarbaev «Rýhanı jańǵyrý» baǵdarlamasy aıasynda «100 jańa esim» jobasynda iriktelgen 102 jeńimpazben kezdesedi. Saltanatty shara Qazaqstan Respýblıkasynyń Tuńǵysh Prezıdenti kúni merekesimen tuspa-tus kelip otyr.
«Bala kezden aıtysta kóp júrdik. Bertin kele jazba poezııa men ǵylymǵa bet burdyq. Qazirgi ýaqytta Túrkııa elinde doktorantýrada oqyp jatyrmyn. Elimizdiń úzdik esimderiniń qatarynan kórinip otyrǵanymyzǵa, eńbegimizdiń elengenine shúkir deımiz. Qasymdaǵy týǵan inim - ǵalym, polıglot, aýdarmashy ári doktorant. Tórt tildi erkin meńgergen. Ekeýimiz de bala kezden atqa otyryp, aýylda ósken balamyz. Bala kezde ekeýimiz jarysyp túnniń bir ýaǵyna deıin kitap oqıtyn edik. Jyr-dastandardy, Abaı, Shákárimniń óleńderin jattap óstik», - deıdi Erjan Jumabek.
Aqyn Erjan Jumabektiń 2012 jyly Mádenıet jáne aqparat mınıstrligi men Qazaqstan Jazýshylar odaǵynyń qoldaýymen «Sheksizdik shuǵylasy» atty kitaby jaryqqa shyqqan.
«Ol kitap 2017 jyly túrki aǵaıyndardyń qoldaýymen túrik tilinde basylyp shyqty. 20 qarasha kúni «Sheksizdik shuǵylasy» kitabymnyń túrik tilindegi nusqasynyń tusaýy kesildi. Kaıserı qalasynda shyǵarmashylyq keshim ótti. Qazaqtyń jas aqyndarynyń shyǵarmashylyǵyna degen túrik aǵaıyndardyń qyzyǵýshylyǵy erekshe eken», - deıdi Shyǵys Qazaqstannyń jigit sultany, Alaman aıtystyń júldegeri, «Serper» syılyǵynyń ıegeri Erjan Jumabek.
Al Erjannyń tórt tildi meńgergen týǵan baýyry Qýanysh Jumabektiń birinshi kitaby «Aǵylshynsha úıreneıik» dep atalady eken.
«Bul kitaptyń ereksheligi - aǵylshyn tiliniń grammatıkasyn basqa tilge súıenbeı tek qazaq tilinde túsindiretin oqýlyq bolyp tabylady. Demek, kitabym qazaq aýdıtorııasyna arnalǵan. Sonymen birge, buryn-sońdy aýdarylmaǵan qazaq ertegilerin aǵylshyn tiline aýdarýdy bastadym. Naqtyraq aıtqanda, «Altyn saqa» sekildi ertegiler bar. Aǵam Erjan Jumabektiń «Sheksizdik shuǵylasy» kitabyn túrik tiline, elimizge belgili Qul-Kerim Elemes aǵamyzdyń «Shyraǵym-aı» atty áńgimeler jınaǵyn aǵylshyn tiline aýdardym. Túriktiń ataqty drammatýrgtarynyń shyǵarmalaryn qazaq tiline tárjimalap jatyrmyn», - deıdi Qýanysh.
Qýanysh aldaǵy ýaqytta Muhtar Áýezovtyń «Abaı joly» romanyn qaıta aǵylshyn tiline aýdarýdy qolǵa almaq eken. Bul josparynyń neden týǵanyn polıglot bylaısha túsindiredi.
«Óz basym aýdarmaǵa kirispes buryn qazaq jáne aǵylshynnyń tanymal romandaryn kóptep oqydym. Men úshin aýdarma qıynǵa soǵady dep aıta almaımyn. Máselen, keıbir aǵylshyn tiline aýdarylǵan kitaptarda kıiz úı degen sóz «tend» dep berilgen eken. Al «tend» degen sóz «shatyr» degen maǵynany bildiredi. ıAǵnı, kóptegen aýdarmalardyń menińshe, maǵynasy ashylmaǵan. Sondyqtan, aýdarmaǵa aldaǵy ýaqytta basa den qoısam deımin», - deıdi Qýanysh Jumabek.