Bir top atyraýlyqqa memlekettik nagrada tapsyryldy

ATYRAÝ. QazAqparat – Atyraýda 25 qazan – Respýblıka kúnine oraılastyrylǵan «Qyran dalam – Qazaqstan» atty saltanatty jıyn ótti. Onda ár salada jumys isteıtin bir top atyraýlyq memlekettik nagradamen marapattaldy, dep habarlaıdy QazAqparat.

Atyraý oblysynyń ákimi Serik Shápkenov óńir jurtshylyǵyn Ulttyq merekemen quttyqtap, ony atap ótýdiń mánine toqtaldy.

«Araǵa ótken birneshe jyldan soń tarıhı sheshim qabyldanyp, ádildik saltanat qurdy. Bul – Respýblıka kúnin ulttyq, memlekettik mereke dárejesinde atap ótýdiń máni óte zor. Búgingi jetýimiz úshin rýhy bıik halqymyz qıyndyqty eńserip keledi. Uly dalamyzdy saqtap qalǵan uly kúsh – halqymyzdyń asqaq rýhy. Memleket basshysy Qasym-Jomart Toqaev «Respýblıka óz isine jaýapty azamattardyń ortaq is-áreketiniń arqasynda qurylady. Óıtkeni, azamattar – memlekettiń arqaýy. Azamattary bolmasa, memleket te bolmaıdy» dedi. Demek, uly mindetter men maqsattarǵa umtylǵan halyq qana óz degenine jete alady. Eń bastysy, ortaq shańyraǵymyz – táýelsiz Otanymyz yrysqa kenelip, kók baıraǵymyz bıikte jelbireı bersin», -dedi Serik Shápkenov.

Saltanatty sharada memlekettik jáne qoǵamdyq qyzmettegi cińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin 33 atyraýlyq marapattaldy.

Máselen, «Parasat» ordenine oblystyq ekonomıka jáne bıýdjettik josparlaý basqarmasynyń basshysy Aıgúl Ájiǵalıeva ıe boldy. «Qurmet» ordeni «Amangeldi atyndaǵy» JShS dırektory Aıgúl Ámirǵalıevaǵa, «Kazkomservıs»JShS quryltaıshysy Qaıyrjan Qultekenovke, «SPC Harmony Schools» JShS-niń atqarýshy dırektory Elma Ismaılǵa, eńbek ardageri Málik Súleımenovke tabys etildi.

Al, ІІІ dárejeli «Eńbek Dańqy» ordeni «Atyraý oblysy Sý Arnasy» KMK-niń bas tehnologi Jámıla Isaǵalıevaǵa, «ISIGıpsInder» JShS-niń 6-razrıadty slesari Nıolaı Kıdalov pen «Atyraý munaı óńdeý zaýyty» JShS-niń qondyrǵy mashınısi Rahmet Túsipovke berildi.

Sondaı-aq, bir top azamat «Eren eńbegi úshin» jáne «Shapaǵat» medalimen, Qazaqstan Respýblıkasynyń Qurmet gramotasymen marapattaldy. Ánshi Gúlmaıdan Súndetova Qazaqstannyń eńbek sińirgen qaıratkeri atandy.